Qazaqstanda oqýshylardyń bilimin baǵalaý talaptary qatańdatylmaq. Jańa tártipke sáikes 5-11 synyp oqýshysy bir nemese eki pánnen jyldyq qorytyndy baǵa retinde «2» alsa, jazǵy kezeńde qaita jiyntyq baǵalaýdan ótedi. Nátijesi qanaǵattanarlyq bolmasa, oqýshy oqý jylyn qaita oqýy múmkin, dep habarlaidy ult.kz.
31-arnanyń «Informbiýro» baǵdarlamasynyń málimetinshe, jańa buiryq boiynsha 1-synyp oqýshylaryna baǵa qoiylmaidy. 2-4 synyptarda 10 baldyq baǵalaý júiesi saqtalady.
Al 5-11 synyp oqýshylarynyń bir nemese eki pánnen jyldyq baǵasy «2» bolsa, jazda qaita baǵalaýdan ótýine múmkindik beriledi. Nátije bolmaǵan jaǵdaida jańa oqý jyly bastalǵanǵa deiin taǵy bir ret synaq tapsyrady. Odan da óte almasa, oqýshy sol synypta qaita qalady.
Ata-analar bul talapqa qatysty ártúrli pikir bildirip otyr. Keibiri oqýshynyń synypta qalý qaýpi onyń bilim alýǵa degen jaýapkershiligin arttyrady dep sanaidy. Olardyń pikirinshe, oqýshyny úlgerimine qaramastan kelesi synypqa ótkize berý bilimindegi olqylyqtardyń jinalýyna ákelýi múmkin.
Sonymen qatar ata-analar qazirgi mektepterde úlgerimi tómen oqýshylarǵa qosymsha sabaq pen basqa da qoldaý kórsetý múmkindikteri bar ekenin atap ótti.
Eske salaiyq, buǵan deiin Neimegen ýniversitetiniń zertteýshileri 14-16 jastaǵy 10 myńnan astam oqýshynyń derekterin zerttep, jasóspirimderdiń oqý úlgerimine qurdastary men áleýmettik ortasy áser etetinin anyqtaǵan.
