Qazaqstan álemdik sport kúntizbesindegi eń bedeldi jarystardyń taǵy birin qabyldamaq. 2027 jyly mánerlep syrǵanaýdan Tórt qurlyq chempionaty alǵash ret elimizde ótetin boldy, dep habarlaidy ult.kz.
Bedeldi halyqaralyq doda 2027 jyldyń 9-14 aqpan kúnderi ótedi. Qazaqstan astanasyna Aziia, Soltústik jáne Ońtústik Amerika, Afrika men Muhit araldary elderinen álemniń eń úzdik sportshylary jinalyp, maýsymnyń mańyzdy jarystarynyń birinde baq synaidy.
Aldaǵy Tórt qurlyq chempionaty Qazaqstan tarihyndaǵy osy sport túri boiynsha ótetin eń aýqymdy halyqaralyq jarys bolmaq. Buǵan deiin elimizde 2011 jylǵy qysqy Aziia oiyndary men 2017 jylǵy qysqy Ýniversiada aiasynda mánerlep syrǵanaý jarystary uiymdastyrylǵanymen, dál osyndai deńgeidegi chempionat alǵash ret ótkizilmek.
Halyqaralyq konkishiler odaǵynyń (ISU) prezidenti Chje Iol Kim Qazaqstanda mundai jarysty ótkizý Ortalyq Aziia jankúierlerine álemdik deńgeidegi sportshylardyń ónerin óz kózderimen kórýge múmkindik beretinin atap ótti.
«Biz mánerlep syrǵanaýdan Tórt qurlyq chempionatyn alǵash ret Qazaqstanda ótkizetinimizge qýanyshtymyz. Bul – Ortalyq Aziia jankúierleri úshin álemdik deńgeidegi jarysty tamashalap, óz kýmirleriniń ónerin jaqynnan kórýge berilgen tamasha múmkindik. Qazaqstanda mánerlep syrǵanaýǵa degen qyzyǵýshylyq jańa deńgeige kóterildi. Astana sportshylar, jankúierler jáne barlyq qatysýshy úshin joǵary deńgeidegi alań bolatynyna senimdimiz», – dedi Chje Iol Kim.
Aita keteiik, mánerlep syrǵanaýdan eresekter arasyndaǵy jańa maýsym Frantsiianyń Anje qalasynda 23-25 qazan aralyǵynda ótetin Gran-pri kezeńimen bastalady.
