Ulttyq statistika biýrosynyń málimetine sáikes 2026 jylǵy 12 tamyzdaǵy jaǵdai boiynsha, esepti aptada Qazaqstanda áleýmettik mańyzy bar azyq-túlik taýarlarynyń birqatarynyń baǵasy tómendedi, dep habarlaidy ult.kz.
Apta ishinde kartoptyń baǵasy (-4,2%), aq qaýdandy qyryqqabat (-1,2%), alma (-1,1%), piiaz ben sábiz (-1%) arzandady. Sondai-aq qatty jáne jartylai qatty irimshiktiń baǵasy (-0,3%), mailylyǵy 5-9% súzbe jáne tuz (-0,2%), birinshi surypty bidai uny men qaimaq (-0,1%) tómendedi.
Birinshi surypty unnan pisirilgen bidai nany, rojki, súiekti siyr eti, súieksiz siyr eti, jylqy eti, mailylyǵy 2,2%-dan 6%-ǵa deiingi pasterlengen, ýltrapasterlengen jáne sterildengen sút, jumyrtqa jáne sary maidyń baǵasy esepti aptada ózgerissiz qaldy.
Óńirlik bóliniste elimizdiń birqatar qalasynda defliatsiialyq dinamika baiqaldy. Áleýmettik mańyzy bar azyq-túlik taýarlarynyń jalpy baǵasy bir apta ishinde Taldyqorǵanda (-0,7%), Aqtaý men Jezqazǵanda (árqaisysy -0,4%), Petropavlda (-0,3%), Astanada (-0,2%), Qaraǵandy, Qostanai, Oral, Óskemen jáne Pavlodar qalalarynda (-0,1%) tómendedi. Almaty, Túrkistan, Aqtóbe, Semei jáne Taraz qalalarynda baǵa aldyńǵy apta deńgeiinde saqtaldy.
Respýblika boiynsha kartoptyń ortasha baǵasy kilogramyna 259 teńgeni qurady, al eń tómen baǵa Pavlodarda tirkeldi – kilogramyna 191 teńge.
Aq qaýdandy qyryqqabattyń respýblika boiynsha ortasha baǵasy kilogramyna 189 teńge boldy. Eń tómen baǵalar Túrkistanda – 142 teńge, Tarazda – 152 teńge deńgeiinde tirkeldi.
Almanyń ortasha baǵasy kilogramyna 797 teńgeni qurady. Eń tómen baǵa Shymkentte tirkeldi – 639 teńge.
Et ónimderiniń ishinde respýblika boiynsha súiekti siyr etiniń ortasha baǵasy kilogramyna 3 779 teńgeni, taýyq etiniń baǵasy 1 736 teńgeni qurady.
Áleýmettik mańyzy bar azyq-túlik taýarlary baǵalary indeksiniń kórsetkishi apta saiyn esepteledi. Baǵalardy baqylaý barlyq oblys ortalyqtarynda, respýblikalyq mańyzy bar qalalarda jáne astanada júrgiziledi. Áleýmettik mańyzy bar azyq-túlik taýarlary baǵasynyń dinamikadaǵy ózgeristerin Qazaqstan Respýblikasy Strategiialyq josparlaý jáne reformalar agenttigi Ulttyq statistika biýrosynyń saitynan jáne «Taldaý» aqparattyq-taldaý júiesinen kórýge bolady.
*Áleýmettik mańyzy bar azyq-túlik taýarlarynyń tizbesi Qazaqstan Respýblikasy Saýda jáne integratsiia ministriniń 2025 jylǵy 23 jeltoqsandaǵy №362-NQ buiryǵymen bekitilgen jáne 31 ataýdaǵy azyq-túlik ónimderin qamtidy.
