2026 jylǵy 8 shildedegi jaǵdai boiynsha esepti aptada Qazaqstanda áleýmettik mańyzy bar birqatar azyq-túlik taýarlary baǵasynyń tómendeýi baiqaldy, dep habarlaidy ult.kz Ulttyq statistika biýrosyna silteme jasap.
Baǵasy eń kóp tómendegen ónim – qiiar 6,5% arzandady. Sonymen qatar qyzanaq (-4,1%), sábiz (-2,1%), súieksiz siyr eti men jumyrtqa (árqaisysy 0,6%), súiekti siyr eti (0,3%), balyq (-0,1%) baǵalary tómendedi.
Óńirler bólinisinde eldiń birqatar qalasynda defliatsiialyq dinamika baiqaldy. Bir apta ishinde áleýmettik mańyzy bar azyq-túlik taýarlarynyń jalpy baǵa deńgeii Qyzylorda men Jezqazǵanda (-0,4%), Petropavl, Óskemen, Qaraǵandy jáne Túrkistan qalalarynda (árqaisysynda -0,2%), Almaty qalasynda (-0,1%) tómendedi. Astana, Shymkent, Aqtóbe, Atyraý, Qostanai, Pavlodar, Semei jáne Taraz qalalarynda baǵalar aldyńǵy apta deńgeiinde saqtaldy.
Respýblika boiynsha qiiardyń ortasha baǵasy bir kilogramyna 549 teńgeni qurady. Eń tómen baǵa Atyraý qalasynda tirkeldi – bir kilogramy 365 teńge.
Qazaqstan boiynsha tazartylǵan kúrishtiń ortasha baǵasy bir kilogramyna 533 teńgeni qurady. Eń tómen baǵa Qyzylordada - 456 teńge jáne Almatyda - 478 teńge deńgeiinde tirkeldi.
El boiynsha aq qaýdandy qyryqqabattyń ortasha baǵasy bir kilogramyna 196 teńgeni qurady. Eń tómen baǵa Túrkistan qalasynda – bir kilogramy 136 teńge.Respýblika boiynsha I sanattaǵy jumyrtqanyń (10 dana) ortasha baǵasy 563 teńgeni qurady. Eń tómen baǵa Qyzylorda (460 teńge) jáne Aqtóbede (484 teńge) baiqaldy.
Áleýmettik mańyzy bar azyq-túlik taýarlary baǵalary indeksiniń kórsetkishi apta saiyn esepteledi. Baǵalardy baqylaý barlyq oblys ortalyqtarynda, respýblikalyq mańyzy bar qalalarda jáne astanada júrgiziledi. Áleýmettik mańyzy bar azyq-túlik taýarlary baǵasynyń dinamikadaǵy ózgeristerin Qazaqstan Respýblikasy Strategiialyq josparlaý jáne reformalar agenttigi Ulttyq statistika biýrosynyń saitynan jáne «Taldaý» aqparattyq-taldaý júiesinen kórýge bolady.
Áleýmettik mańyzy bar azyq-túlik taýarlarynyń tizbesi Qazaqstan Respýblikasy Saýda jáne integratsiia ministriniń 2025 jylǵy 23 jeltoqsandaǵy №362-NQ buiryǵymen bekitilgen jáne 31 ataýdaǵy azyq-túlik ónimderin qamtidy.
