10 tamyzda elimizde Abai kúni atalyp ótedi. Uly aqyn, oishyl, aǵartýshy ári kompozitor Abai Qunanbaiulynyń týǵanyna 181 jyl tolýyna orai respýblika boiynsha 350-den astam mádeni, ǵylymi-tanymdyq, bilim berý jáne sporttyq is-shara uiymdastyrylady, dep habarlaidy ult.kz.
Abai murasy álemdik deńgeide keńinen tanylǵan. 1995 jyly aqynnyń 150 jyldyǵy IýNESKO kóleminde atalyp ótti. Onyń ádebi, filosofiialyq jáne mýzykalyq murasy, bilim, eńbek, ádilet jáne adamgershilik týraly oi-tujyrymdary búgin de óz mańyzyn joǵaltqan joq.
Respýblikalyq baǵdarlamadaǵy negizgi is-sharalar Mádeniet jáne aqparat ministrligine qarasty uiymdarda ótedi.
7 tamyzda Ulttyq akademiialyq kitaphanada oishyl murasyn zertteýge jáne keńinen tanytýǵa arnalǵan «Abai álemi – máńgilik mura» halyqaralyq ǵylymi-praktikalyq konferentsiiasy ótti.
Almatydaǵy Qazaqstan Respýblikasynyń Ulttyq kitaphanasynda «Uly halyqtyń – Uly Abaiy» ziiatkerlik saiysy uiymdastyryldy. Al Ulttyq mýzeide «Abai sózi – urpaqqa amanat» mýzei sabaǵy jáne aqynnyń ómiri men shyǵarmashylyǵyn dáripteitin «Abai muralary – kóneniń kózi» taqyryptyq ekskýrsiiasy ótti.
Semeidegi Abaidyń memlekettik mýzei-qoryǵy da ataýly kúnge arnaiy baǵdarlama ázirledi. 10 tamyzda munda «Abai beineleý ónerinde» jáne «Abaidyń ómir derekteri…» kórmeleri ashylady. Sondai-aq ádebi kvest pen Abai ánderiniń festivali uiymdastyrylyp, «Uly aqyn Abai uldarymen» eskertkishine gúl shoqtary qoiylady. Ábilhan Qasteev atyndaǵy Qazaqstan Respýblikasynyń Ulttyq óner mýzeii, Qazaqstan Respýblikasynyń Ulttyq ortalyq mýzeii, «Berel», «Tańbaly» mýzei-qoryqtary jáne basqa da mádeniet mekemeleri taqyryptyq jobalaryn usynady.
Teatrlar men kino uiymdary mýzykalyq jobalar men beinematerialdardy tanystyryp, Abai shyǵarmalary jelisinde sahnalanǵan qoiylymdardan úzindiler kórsetedi. 10 tamyzda Almatyda Mádeniet jáne aqparat ministrliginiń tapsyrysymen jáne Ulttyq kinony qoldaý memlekettik ortalyǵynyń qoldaýymen túsirilgen «Alǵashqy kitap» derekti filminiń resmi tusaýkeseri ótedi.
Abai kúnine arnalǵan is-sharalar Beijińde de uiymdastyrylady. 10 tamyzda Qazaqstannyń mádeni ortalyǵy «Tszintai» mýzeiimen birlesip «Abai – Uly tulǵa» dóńgelek ústelin ótkizedi. Jiynda oishyldyń ádebi-filosofiialyq murasy men onyń ideialaryn shetelde keńinen tanytý máseleleri sóz bolady.
Astanada da aýqymdy baǵdarlama usynylady. 8-10 tamyz aralyǵynda Qalamgerler alleiasynda «Óleń sózdiń patshasy…» poeziia keshi uiymdastyrylyp, qala saiabaqtarynda ótetin «Ándi súiseń, menshe súi» is-sharasynda Abaidyń ánderi shyrqalady. Elimizdiń ár óńirinen kelgen jas qalamgerler «Sóz óneri. Jasampaz jas qalam» respýblikalyq forýmynda bas qosady. Budan bólek, ádebi-sazdy keshter, dárister, viktorinalar men kitap kórmeleri ótedi.
Almatyda ádebi jáne aǵartýshylyq baǵyttaǵy is-sharalar jalǵasady. Shymkentte poeziialyq jáne tanymdyq baǵdarlamalar uiymdastyrylyp, «Hakim Abai» mýzeiinde ashyq esik kúni, taqyryptyq kórme men ekskýrsiialar ótedi.
Óńirlerde aitystar men kontsertter, teatr qoiylymdary, «Abai oqýlary» baiqaýlary, poeziia keshteri, kórmeler jáne túrli tanymdyq jobalar uiymdastyrylady.
Abai oblysynda 8-9 tamyz kúnderi «Abai Joly – 100 miles» respýblikalyq ýltramarafony ótkizilse, 10 tamyzda «Adamzattyń Abaiy» aqyndar aitysy ótedi. Merekelik is-sharalar oblys ortalyqtarymen qatar, qalalar, aýdandar men aýyldardy da qamtidy.
10 tamyzda Astana, Almaty, Shymkent qalalary men oblys ortalyqtarynda Abai Qunanbaiulynyń eskertkishterine gúl shoqtary qoiylady. Arnaiy rásimge ziialy qaýym ókilderi, mádeniet qairatkerleri, jastar jáne jurtshylyq qatysady.
