«Samuryq-Qazyna» AQ basqarmasynyń sheshimimen Eljas Muratuly Otynshiev «Qazaqstan temir joly» ulttyq kompaniiasy» AQ basqarma tóraǵasy qyzmetine taǵaiyndaldy, dep habarlaidy ult.kz.
Eljas Otynshiev Máskeý fizika-tehnikalyq institýtynda «Jalpy jáne qoldanbaly fizika» mamandyǵy boiynsha bakalavr jáne magistr dárejesin alǵan.
Eńbek jolyn 2007 jyly Máskeýdegi Ernst & Young kompaniiasynyń biznes-baǵalaý jáne mámilelerdi súiemeldeý departamentinde keńesshi bolyp bastaǵan.
2009–2019 jyldary «Samuryq-Qazyna» AQ men onyń enshiles uiymdarynda túrli qyzmetter atqardy. 2021–2023 jyldary KIDF uiymynda basshylyq laýazymdarda jumys istep, investitsiialyq portfeldi basqarýǵa jetekshilik etti.
2023 jyldyń sáýirinen beri «Samuryq-Qazyna» AQ strategiia jáne aktivterdi basqarý jónindegi basqarýshy direktory – basqarma múshesi qyzmetin atqaryp, qordyń munai-gaz, temirjol, taý-ken jáne basqa da salalardaǵy portfeldik kompaniialaryn basqarýǵa jaýapty boldy.
2024 jyldyń aqpanynan bastap «Qazaqstan temir joly» AQ direktorlar keńesiniń múshesi.
2023 jyly Qazaqstan Respýblikasynyń «Eren eńbegi úshin» medalimen marapattalǵan.
