Qazaqstannyń erler quramasy shpagamen semserlesýden tarihta tuńǵysh ret álem chempiony atandy, dep habarlaidy ult.kz.
Gonkongte (Qytai) ótken álem chempionatynyń finalynda qazaqstandyqtar Ýkraina quramasymen kezdesti. Finaldyń taǵy bir ereksheligi – Qazaqstan quramasynyń bas bapkeri, ýkrainalyq maman Aleksandr Gorbachýktyń óz eliniń quramasyna qarsy shyqqany boldy.
Finaldaǵy Qazaqstan quramasynyń sapynda Vadim Sharlaimov, Erlik Sertai, Kirill Prohodov jáne Rýslan Kýrbanov óner kórsetti.
Alǵashqy jekpe-jekterde qos komanda bir-birin barlap, tipti enjar áreket etkeni úshin eki jaq ta eskertý aldy. Alaida kezdesýdiń alǵashqy úshten bir bóliginen keiin Qazaqstan quramasy eki upai aiyrmasymen alǵa shyqty.
Kezdesýdiń ortasynda Vadim Sharlaimov aiaǵyn jeńil jaraqattap alyp, meditsinalyq úzilis jasaýǵa májbúr boldy. Soǵan qaramastan bapker ony almastyrmai, úzilisten keiin Sharlaimov tórt upailyq sátti seriia jasap, komandasynyń basymdyǵyn arttyrdy.
Matchtyń sońyna qarai Ýkraina quramasy esep aiyrmasyn eki upaiǵa deiin qysqartty.
Alaida jaraqatyna bailanysty Vadim Sharlaimov finaldaǵy sońǵy jekpe-jegine shyǵa almady. Onyń ornyna eldegi álem chempionattarynyń jeke synynda júlde alǵan jalǵyz semserlesýshi Rýslan Kýrbanov shyqty.
Sońǵy aiqas aldynda Qazaqstan quramasy bes upai basymdyqqa ie boldy. Sheshýshi jekpe-jekke 19 jastaǵy Kirill Prohodov shyǵyp, jaýapkershilikti sátti eńserip, matchty jeńispen aiaqtady.
Qorytyndy esep – 45:40. Qazaqstan quramasy alǵash ret álem chempiony atandy.
Aita keteiik, týrnir bastalar aldynda Qazaqstan quramasy álemdik reitingte 5-orynda turǵan bolatyn. Sondyqtan bul jeńisti kútpegen ári sensatsiialyq nátije deýge bolady.
Qola júldeni tartysty básekede Mysyr quramasy jeńip aldy. Aita keteiik, qazaqstandyqtar bul komandany jartylai finalda jeńgen bolatyn.
Gonkongte ótip jatqan álem chempionatynda Qazaqstan quramasy Finliandiia, Ózbekstan, Daniia jáne Mysyr quramalaryn jeńip shyqty.
Eń tartysty kezdesý Ózbekstan quramasyna qarsy ótti. Bul matchta qazaqstandyq semserlesýshiler eseptegi basymdyqty qaitaryp, sońǵy sátte bir ǵana upai aiyrmasymen jeńiske jetti.
Eske salaiyq, buǵan deiin Qazaqstan quramasynyń álem chempionattaryndaǵy eń úzdik nátijesi ótken jyly Grýziiada jeńip alǵan qola júlde bolatyn.
Tarihi altyn medaldan keiin komanda kóshbasshysy Rýslan Kýrbanov Tengri Sport basylymyna bergen suhbatynda Qazaqstandaǵy semserlesý sportynyń damýy týraly pikir bildirdi.
