Qazaqstanda sheteldik psihologtardyń onlain-konsýltatsiia berý qyzmetin retteý máselesi talqylanyp jatyr. Bul týraly QR Eńbek jáne halyqty áleýmettik qorǵaý birinshi vitse-ministri Erbol Tuiaqbaev Senattyń jalpy otyrysynda málimdedi, dep habarlaidy ult.kz.
Senatta «Psihologiialyq qyzmet týraly» zań jobasyn talqylaý barysynda depýtat Bibigúl Jeksenbai qazaqstandyqtarǵa onlain keńes beretin sheteldik psihologtardyń qyzmetine qatysty suraq qoidy.
Erbol Tuiaqbaevtyń aitýynsha, álemniń kez kelgen elindegi mamannan onlain keńes alý múmkindigi búgingi tsifrlyq dáýirdiń ereksheligine ainalǵan. Mundai máselemen qazir kóptegen memleketter betpe-bet kelip otyr.
Osyǵan bailanysty ministrlik el ishinde psihologiialyq qyzmet kórsetý salasyn júieli retteýge basymdyq berip otyr. Atap aitqanda, psihologtardyń memlekettik tizilimin engizý, biryńǵai biliktilik talaptaryn bekitý jáne mamandardyń kásibi quzyretterin rastaý tetikterin qalyptastyrý josparlanǵan.
Birinshi vitse-ministrdiń sózinshe, Qazaqstan aýmaǵynda tikelei qyzmet kórsetetin sheteldik psihologtar, iaǵni jeke qabyldaý júrgizetin nemese túrli is-shara uiymdastyratyn mamandar ulttyq zańnama talaptaryn saqtaýǵa mindetti.
Al shetelden onlain formatta qyzmet kórsetetin mamandarǵa qatysty másele transshekaralyq tsifrlyq qyzmetterdi retteý sanatyna jatady.
«Bul tek psihologiia salasyna ǵana emes, meditsina, bilim berý jáne konsalting qyzmetterine de qatysty. Bizdiń basty mindetimiz – eń aldymen el ishinde azamattardyń quqyqtaryn qorǵaýǵa jáne psihologiialyq qyzmetti tiimdi retteýge baǵyttalǵan júie qurý. Al transshekaralyq retteý máseleleri halyqaralyq deńgeide jan-jaqty pysyqtaýdy qajet etedi», – dedi Erbol Tuiaqbaev.
Onyń aitýynsha, jańa zań aiasynda psihologiialyq qyzmet kórsetý sapasyn arttyrýǵa jáne azamattardyń qaýipsizdigin qamtamasyz etýge baǵyttalǵan birqatar tetikter qarastyrylyp jatyr.
