MICHELIN Guide álemdegi eń úzdik qonaqúilerdiń halyqaralyq tizimin — MICHELIN Key Selection 2026 jinaǵyn jariialady. Qazaqstan bul bedeldi gidtiń geografiiasyna alǵash ret enip otyr: otandyq qonaqúiler bedeldi jinaqqa qosylyp qana qoimai, MICHELIN Key arnaiy belgisine ie boldy, dep habarlaidy ult.kz.
MICHELIN Key — qonaqúi salasyndaǵy kýlinariialyq «Mishlen juldyzynyń» resmi balamasy. Táýelsiz ári anonimdi inspektsiia qorytyndysy boiynsha elimizdegi 5 qonaqúi One MICHELIN Key («Bir Mishlen kilti») belgisine ie boldy:
- The Veil Hotel (Astana q.)
- The St. Regis Astana (Astana q.)
- The Ritz-Carlton, Astana (Astana q.)
- The Ritz-Carlton, Almaty (Almaty q.)
- Tenir Eco Hotel (Almaty q.)
Budan bólek, MICHELIN Guide usynystarynyń jalpy sanatyna Qazaqstannyń taǵy 9 qonaqúii endi. Olardyń qatarynda: Sheraton Astana Hotel, Swissôtel Wellness Resort Alatau Almaty, Qazaq Auyl Eco Hotel, Qazaq Garden, Donatello Premium Almaty, Radisson Blu Hotel Almaty Airport, Zvezdnaya Eco-Hotel, YURTA Boutique Hotel jáne Medina Palace Hotel bar.
MICHELIN sarapshylary elimizdiń jahandyq týrizmdegi ósip kele jatqan tartymdylyǵyn erekshe atap ótti:
«Alǵashqy «Mishlen kilti» — bul úlken qýanysh ári saiahatshylar úshin qalyptasqan dástúrli baǵyttardan tys aimaqtarǵa kóz tastaýǵa jasalǵan shaqyrý. Botsvanadaǵy safariden bastap Qazaqstan elordasyndaǵy sáýlet oazisine deiin — osy bes eldiń qonaqúileri saparǵa shyǵýǵa múldem ózgeshe sebepter usynady jáne inspektorlarymyz ádettegi týristik kartalardan tys jerlerden ne tapqanyn kórsetedi».
Qazaqstandyq qonaqúilerdiń bul mártebeli tizimge enýi — «Kazakh Tourism» UK» AQ-nyń týristik infraqurylymdy júieli damytýǵa jáne qonaqjailylyq standarttaryn arttyrýǵa baǵyttalǵan strategiialyq bastamalarynyń arqasynda múmkin boldy. Halyqaralyq deńgeidegi mundai baǵa Qazaqstannyń joǵary sapaly týrizm ortalyǵy retindegi bedelin arttyryp, sheteldik týrister úshin tartymdylyǵyn kúsheite túsedi.
«Qazaqstannyń álemdik MICHELIN kartasynan kórinýi — otandyq qonaqúilerdegi joǵary qyzmet sapasy men erekshe bolmystyń halyqaralyq deńgeide moiyndalýy. Halyqaralyq tizimge birden 14 nysannyń enýi eldegi qonaqúi biznesiniń básekege qabilettiligin dáleldeidi ári búkil týrizm infraqurylymynyń damýyna úlken serpin beredi. Endigi basty mindetimiz — osy joǵary baǵany elge keletin saiahatshylar aǵynyn arttyrýǵa baǵyttap, Qazaqstandy Ortalyq Aziiadaǵy basty týristik baǵyt retinde ornyqtyrý», — dep atap ótti «Kazakh Tourism» UK» AQ Basqarma Tóraǵasy Talǵat Ǵazizov.
Aita keteiik, MICHELIN Key belgisi 2024 jyly qonaqúi salasyn táýelsiz baǵalaý úshin qurylǵan. Baǵalaý barysynda 1900 jyldan beri meiramhanalarǵa qoldanylyp kele jatqan qatań ádisteme men joǵary talaptar negizge alynady. Nysandardy anonimdi inspektorlar bes ámbebap kriterii boiynsha baǵalaidy: qonaqúidiń qonaqqa óńirdiń bolmysyn asha bilýi, sáýleti men interer dizainynyń sapasy, qyzmet kórsetý sapasy men jailylyqtyń turaqtylyǵy, baǵa men kórsetilgen qyzmettiń sáikestigi, sondai-aq nysannyń daralyǵy men ózindik koloriti.
One MICHELIN Key («Erekshe demalys») belgisi ózindik sipaty bar jáne óz deńgeiindegi ortasha salalyq kórsetkishterden áldeqaida joǵary qyzmet kórsetetin qonaqúilerge beriledi.
