Qazaqstan Legatum Prosperity Index 2026 jahandyq ál-aýqat reitinginde 161 eldiń ishinde 66-orynǵa turaqtap, Ortalyq Aziia memleketteri arasynda eń joǵary kórsetkishke ie boldy. Bul týraly Prosperity Institute jariialaǵan reitingte aitylǵan, dep habarlaidy ult.kz.
Reitingte Qazaqstannan keiin Qyrǵyzstan – 87-orynda, Ózbekstan – 94-orynda, Tájikstan – 129-orynda, al Túrikmenstan – 150-orynda ornalasqan. Resei 103-orynǵa jaiǵasty.
Qazaqstan eń joǵary nátijeni bilim berý salasynda kórsetti. Bul kórsetkish boiynsha el álemde 32-orynǵa ie boldy. Sondai-aq otbasy bailanystarynyń beriktigi boiynsha 30-oryndy, al ómir súrý deńgeii boiynsha 53-oryndy ielendi.
Álemdik reitingtiń kóshin Shveitsariia bastady. Alǵashqy bestikke sondai-aq Norvegiia, Irlandiia, Daniia jáne Finliandiia endi.
Legatum Prosperity Index elderdiń ál-aýqatyn úsh negizgi baǵyt boiynsha baǵalaidy: damý deńgeii, erkindik jáne qoǵamdyq bailanystardyń jaǵdaiy. Reitingti jasaý barysynda ómir súrý deńgeii, densaýlyq saqtaý, bilim berý, ekonomikalyq erkindik, qaýipsizdik jáne qoǵamdaǵy qarym-qatynastardy qamtityn 150-den astam kórsetkish esepke alynady.
2026 jylǵy reitingte ádisteme jańartylyp, eldiń jalpy nátijesin esepteý kezinde álsiz kórsetkishterdiń yqpaly kúsheitilgen.
