Ábilhan Qasteev atyndaǵy Qazaqstan Respýblikasynyń Ulttyq óner mýzeiinde «Armeniia palitrasy» kórmesi ashyldy. Ekspozitsiiaǵa mýzei qorynda saqtalǵan armian sýretshileriniń týyndylary qoiyldy. Kórme kórermendi XX ǵasyrdaǵy armian halqynyń beineleý ónerimen tanystyryp, Qazaqstan men Armeniia arasyndaǵy mádeni bailanysty odan ári damytýǵa baǵyttalady. Bul týraly QR Mádeniet jáne aqparat ministrliginiń baspasóz qyzmeti habarlady, dep jazady ult.kz.
Qazaqstan Respýblikasy Premer-ministriniń orynbasary – Mádeniet jáne aqparat ministri Aida Balaeva kórmege qatysýshylarǵa joldaǵan quttyqtaý hatynda eki el arasyndaǵy qarym-qatynasty nyǵaitýda mádeniettiń airyqsha ról atqaratynyn atap ótti.
«Qazaqstan men Armeniia arasyndaǵy qarym-qatynas qurmet pen dostyqqa, uzaq jyldar boiy qalyptasqan mádeni-gýmanitarlyq yntymaqtastyqqa negizdelgen. Bul rette mádeniettiń orny airyqsha. Mádeni bailanys eki halyqty jaqyndastyryp, bir-biriniń tarihyn, dástúri men rýhani qundylyqtaryn tereńirek tanýǵa múmkindik beredi», – delingen quttyqtaý hatta.
Kórmege keskindeme, músin jáne sándik-qoldanbaly óner týyndylary qoiylǵan. Olardyń qatarynda Ivan Aivazovskii, Martiros Sarian, Minas Avetisian, Mariam Aslamazian, Grigor Handjian jáne ózge de belgili sheberlerdiń eńbekteri bar.
Ár býyn sýretshileriniń týyndylary arqyly XX ǵasyrdaǵy armian óneriniń damýymen, janrlyq erekshelikterimen jáne basqa da baǵyttarymen tanysýǵa bolady. Kórmeniń Ábilhan Qasteev atyndaǵy Qazaqstan Respýblikasynyń Ulttyq óner mýzeii qoryndaǵy týyndylardan jasaqtalýy onyń mańyzyn arttyra túsedi. Mýzeide saqtalǵan armian sheberleriniń eńbekteri eki el arasyndaǵy kópjyldyq mádeni bailanysty da aishyqtaidy.
Mýzeiler arasyndaǵy yntymaqtastyq Armeniia Ulttyq galereiasynda jalǵasyn tabady. Onda Ábilhan Qasteev atyndaǵy Qazaqstan Respýblikasynyń Ulttyq óner mýzeii qoryndaǵy Vardges Sýreniantstyń «Pokinýtaia» týyndysy tanystyrylady.
Kórme 2026 jylǵy 2 qyrkúiekke deiin jalǵasady.
