Qazaqstan Respýblikasy Kólik vitse-ministri Talǵat Lastaev pen «Urumqi Airlines» áýe kompaniiasynyń vitse-prezidenti Chjan Lian myrzanyń kezdesýi ótti. Kezdesý barysynda Qytai tarapy Úrimshi – Qaraǵandy, Qulja (Inin) – Astana jáne Qulja (Inin) – Almaty baǵyttary boiynsha jańa turaqty reister ashý josparlary týraly habarlady.
Óz kezeginde qazaqstandyq tarap Óskemen jáne Semei qalalaryna, sondai-aq aldaǵy ýaqytta Zaisan men Katonqaraǵaidaǵy jańa óńirlik áýejailarǵa reister ashý múmkindigin qarastyrýdy usyndy. Bul bastama týrizmdi damytýǵa, kólik qoljetimdiligin arttyrýǵa jáne Qazaqstan men Qytai arasyndaǵy saýda-ekonomikalyq bailanystardy nyǵaitýǵa yqpal etedi.
«Urumqi Airlines» áýe kompaniiasy Qytaida óndirilgen COMAC C909 áýe kemelerin paidalanady. Osyǵan bailanysty taraptar Qazaqstanda COMAC áýe kemelerin qoldana otyryp, óńirlik tasymaldardy júzege asyratyn birlesken óńirlik áýe kompaniiasyn qurý jónindegi birlesken jobany iske asyrý múmkindigin talqylady. Atalǵan áýe kompaniiasy Zaisan, Katonqaraǵai jáne týristik áleýeti joǵary basqa da qalalarǵa reister oryndaýǵa múmkindik beredi.
Kezdesý qorytyndysy boiynsha taraptar azamattyq aviatsiia salasyndaǵy yntymaqtastyqty odan ári damytýǵa jáne birlesken jobalardy júzege asyrýǵa ózara múddeli ekendikterin rastady.
