QR Ǵylym jáne joǵary bilim ministri Saiasat Nurbektiń Seoul Cyber University (SCU) basshylyǵymen kezdesýinde koreialyq ýniversitet pen Almaty gýmanitarlyq-ekonomikalyq ýniversiteti (AGEÝ) arasyndaǵy seriktestikti damytý máselesi atap ótildi, dep habarlaidy ult.kz.
AGEÝ men Seoul Cyber University arasyndaǵy yntymaqtastyq Qazaqstan men Koreia Respýblikasy arasyndaǵy halyqaralyq bilim berý bailanystaryn damytýdyń naqty mysaldarynyń biri. 2025 jylǵy jeltoqsanda eki ýniversitet ózara túsinistik týraly memorandýmǵa qol qoiyp, joǵary bilim berý salasyndaǵy strategiialyq seriktestiktiń negizin qalady.
Qol jetkizilgen kelisimder aiasynda AGEÝ men Seoul Cyber University bakalavriat deńgeiinde «Aqparattyq qaýipsizdik jáne jasandy intellekt» (6B06107) bilim berý baǵdarlamasy boiynsha qos diplomdy birlesken baǵdarlamany iske asyrýdy josparlap otyr.
Baǵdarlama qazaqstandyq stýdentterdiń halyqaralyq bilim alý múmkindikterin keńeitýge baǵyttalǵan. Stýdentter eki ýniversitette bilim alyp, olardyń akademiialyq jáne bilim berý resýrstaryna qol jetkizedi, sondai-aq AGEÝ men Seoul Cyber University diplomdaryn ielenedi.
Oqý úderisin 1+2+1 modeli boiynsha uiymdastyrý josparlanyp otyr, stýdentter birinshi jáne tórtinshi kýrstardy AGEÝ-de, al ekinshi jáne úshinshi kýrstardy Seoul Cyber University-de oqidy. Bul format stýdentterge eki akademiialyq ortada bilim alyp, halyqaralyq kásibi bailanystaryn keńeitýge, aqparattyq tehnologiialar men jasandy intellekt salasyndaǵy quzyretterin damytýǵa jáne eńbek naryǵyndaǵy básekege qabilettiligin arttyrýǵa múmkindik beredi.
AGEÝ men Seoul Cyber University arasyndaǵy seriktestik zamanaýi halyqaralyq bilim berý formattaryn, akademiialyq utqyrlyqty damytýǵa jáne aqparattyq qaýipsizdik, jasandy intellekt pen tsifrlyq tehnologiialar salasynda jańa býyn mamandaryn daiarlaýǵa baǵyttalǵan.
