9 qyrkúiekte Geologiialyq klaster aýmaǵynda «Qazaqmys korporatsiiasy» JShS men onyń enshiles kompaniialarynyń 2026 jyly «Ulytaý ýniversiteti» KEAQ-ǵa oqýǵa túsken qyzmetkerlerine arnalǵan oqý jylynyń ashylý rásimi ótti. Is-sharaǵa qatysýshylar ýniversitettiń bilim berý modelimen, oqý protsesiniń uiymdastyrylýymen jáne oqý infraqurylymymen tanysty, dep habarlaidy ult.kz.
Ýniversitettiń alǵashqy qabyldaýyna 163 stýdent kirdi. Onyń ishinde 103-i – Korporatsiia kásiporyndarynda qazirgi ýaqytta jumys istep júrgen qyzmetkerler. 52 qyzmetker ekinshi joǵary bilim alý úshin bakalavriat baǵdarlamalaryna qabyldansa, taǵy 51 stýdent – «Qazaqmys» korporatsiiasynyń Tehnologiialyq kolledjiniń túlekteri. Olar úshin buryn alǵan bilimi men praktikalyq tájiribesi eskerilip, qysqartylǵan oqý baǵdarlamalary qarastyrylǵan.
Oqý protsesiniń negizgi baǵyttarynyń biri – dýaldy oqytý elementteri bar praktikalyq tásil. Teoriialyq bilim óndiristik nysandardaǵy tájiribemen ushtasady. Bul stýdentterge naqty óndiristik mindettermen jumys istep, alǵan bilimin kásiporyndarda tikelei qoldanýǵa múmkindik beredi.
Qazirdiń ózinde jumys istep júrgen qyzmetkerler úshin mundai model kásibi qyzmetin joǵary bilim alýmen qatar alyp júrýge múmkindik beredi. Oqý traektoriiasyn qalyptastyrý kezinde qyzmetkerlerdiń óndiristik tájiribesi men buryn meńgergen pánderi eskeriledi.
«Ulytaý ýniversiteti» KEAQ Basqarma tóraǵasy – rektor Aidos Sákenov «Qazaqmyspen» yntymaqtastyq taý-ken metallýrgiia salasynyń qajettilikterin eskere otyryp, injenerlik-tehnikalyq mamandar daiarlaýǵa negiz qalyptastyratynyn atap ótti.
— Bizdiń mindetimiz – jai ǵana diplom berip shyǵarý emes, taý-ken óndirisin jaqsy biletin, óndiristik mindetterdi sheshe alatyn, zamanaýi tehnologiialardy meńgergen jáne bolashaqta korporatsiianyń injenerlik ári basqarýshylyq áleýetin nyǵaita alatyn mamandar daiarlaý. Sizder – osy modeldiń alǵashqy qatysýshylarynyń birisizder, – dedi Aidos Sákenov.
«Qazaqmys» úshin ýniversitetpen áriptestik – kadrlyq áleýetti damytý, qyzmetkerlerdiń biliktiligin arttyrý jáne kásibi kadr rezervin qalyptastyrýdyń mańyzdy quraldarynyń biri. Aldaǵy ýaqytta praktikalyq daiarlyqty keńeitý, kásiporyn mamandaryn bilim berý protsesine tartý jáne naqty óndiristik keisterdi oqý baǵdarlamalarynda paidalaný josparlanyp otyr.
