Qazaqstan Respýblikasy Mádeniet jáne aqparat ministrliginiń qoldaýymen 2026 jyldyń 27 maýsymynda Roza Baǵlanova atyndaǵy «Qazaqkontsert» memlekettik akademiialyq kontserttik uiymynda 65-kontserttik maýsymnyń jabylýyna arnalǵan aýqymdy «FOLK SHOW» Gala-kontserti ótti.
«FOLK SHOW» – ulttyq mýzykalyq murany zamanaýi formatta dáripteýge baǵyttalǵan biregei kontserttik joba. Jobanyń avtory ári dirijeri – respýblikalyq jáne halyqaralyq baiqaýlardyń laýreaty, Mádeniet salasynyń úzdigi, zamanaýi mýzyka óneriniń jarqyn ókili Ádilet Azbaev.
Gala-kontsertte «Astana sazy» Qazaq memlekettik folklorlyq ansambli, Qazaq memlekettik simfoniialyq orkestri jáne G band-tyń oryndaýyndaǵy álemdik hitterdi, tanymal kino jáne telejobalardyń saýndtrekterin, sondai-aq qazaq mýzykasynyń keńinen tanylǵan týyndylary kórermen nazaryna usynyldy.
Foto: Qazaqkontsert
Sondai-aq, mýzykalyq keshte «Gúlder» bi ansambli, «Birlik» bi ansambli, «Astana Musical» memlekettik teatrynyń shyǵarmashylyq ujymy, Erbol Tájibaev, Aizada Kemel, Oljas Qurmanbek, Altynshash Muqataeva, Didar Abdýhalyq, Janna, Núrken Iakiiaev, Samǵar Tolqynhanuly jáne Qazaqkontserttiń ózge de belgili ártisteri óner kórsetti.
Foto: Qazaqkontsert
Baǵdarlamada «Qazaq Symphony», «Shal», «KZ Hits», «Detstvo», Batyrhan Shúkenov shyǵarmalaryna arnalǵan mýzykalyq kompozitsiialar, «Qazaqsha trend» toptamasy jáne Qurmanǵazynyń «Adai» kúii syndy qazaq mýyzkasynyń altyn qorynan týyndylar jáne «La La Land», «Avatar», «Titanic», «Game Evolution», «Game of Thrones», «Va-bank» jáne «Bollywood Medley» siiaqty álemdik hitter men kinoindýstriianyń úzdik saýndtrekteri de kórermenniń ystyq yqylasyna bólendi. Kesh qonaqtary túrli baǵyttaǵy shyǵarmalardy tyńdap qana qoimai, horeografiialyq qoiylymdardy tamashalady.
Aita keteiik, kontserttiń basty maqsaty – ulttyq mýzykalyq ónerdi keńinen nasihattaý, halyq aspaptarynyń shyǵarmashylyq áleýetin kórsetý boldy. Osylaisha «Qazaqkontsert» 65-maýsymnyń qorytyndysynda dástúrli ónerdi qazirgi zamanǵy mýzykalyq úrdistermen sabaqtastyra otyryp, myńǵa jýyq kórermenge san túrli emotsiia syilap, jańa maýsymǵa deiin qosh aitysty.
Kesh sońynda QR Mádeniet jáne aqparat ministrliginiń atynan «Qazaqkontsert» ujymyna «Yqylas gúli» tabystaldy.
Foto: Qazaqkontsert
