QazaqGaz direktorlar keńesiniń sheshimimen "Samuryq-Qazyna" basqarmasynyń kelisimi boiynsha basqarma quramy tolyǵymen jańardy, - dep habarlaidy Tengrinews.kz tilshisi kompaniianyń baspasóz qyzmetine silteme jasap.
QazaqGaz basqarma tóraǵasynyń birinshi orynbasary bolyp Erlan Muqai taǵaiyndaldy. Onyń ministrlik, memlekettik qarjy uiymdary men vedomstvolarda aitarlyqtai jinalǵan tájiribesi bar.
"Qarjy ministrliginde, kvazimemlekettik sektorda, sondai-aq, halyqaralyq munai-gaz kompaniialarynda jumys istegen Erlan Muqai qarjy jáne marketing máselelerinde jańa ádister qoldandy. Shell halyqaralyq kompaniiasynda (Niderlandyda) qarjy direktory, "QazMunaiGaz" UK" AQ basqarma tóraǵasynyń ekonomika jáne qarjy jónindegi orynbasary, basqa da kvazimemlekettik jáne jeke kompaniialarda basshylyq qyzmetter atqarǵan", - delingen habarlamada.
Basqarma tóraǵasynyń óndiris jáne marketing jónindegi orynbasary bolyp Meiirbek Ihsanov taǵaiyndaldy. Onyń halyqaralyq kompaniialarda óndiristik jáne basqarýshylyq jumystar boiynsha tájiribesi bar. 9 elde iri jobalardy iske asyrýǵa qatysqan.
"Taǵaiyndalǵanǵa deiin Kýveit, Katar, Egipet, Resei, sondai-aq, Taiaý Shyǵys pen Orta Aziiadaǵy Schlumberger halyqaralyq kompaniiasyndaǵy marketing jáne jańa tehnologiialardy satý jónindegi óńirlik direktor bolyp jumys istedi. Schlumberger (Frantsiia) kompaniiasynyń bas keńsesinde Management Development baǵdarlamasynan ótti", - dep atap ótti baspasóz qyzmeti ókili.
Basqarma tóraǵasynyń ekonomika jáne qarjy jónindegi orynbasary bolyp Aidyn Aqan taǵaiyndaldy. Ol iskerlik ákimshilik salasynda magistr dárejesin (MBA in Finance, University of Wales, Ulybritaniia) alǵan.
"QazMunaiGaz" jáne "Qazatomónerkásip" ulttyq kompaniialarynda jumys tájiribesi bar, onda birneshe jobalarǵa belsendi qatysqan", - delingen habarlamada.
Basqarma tóraǵasynyń strategiia jáne biznesti damytý jónindegi orynbasary laýazymyna Qazaqstannyń gaz tasymaldaý salasy boiynsha 20 jyl jumys ótili bar Arman Qasenov taǵaiyndaldy.
"Ár jyldary "QazTransGaz" kompaniialar tobynda basshylyq qyzmetter atqardy. "QazTransGaz Ónimderi" kompaniiasyn basqardy, "QazTransGaz" AQ bas direktorynyń orynbasary boldy, Qarjy, marketing jáne korporativtik damý máselelerine jetekshilik etti. Ekonomika ǵylymdarynyń kandidaty ǵylymi dárejesi bar", - dep atap ótti ulttyq kompaniia ókili.
