Threads áleýmettik jelisinde qazaq estradasyndaǵy áieldiń erkindigi men otbasyndaǵy róline qatysty án mátinderi talqylandy. Qoldanýshylar keibir tanymal kompozitsiialardy «red flag» dep atap, olardyń jekelegen joldaryna nazar aýdardy, dep habarlaidy ult.kz.
Máselen, toilarda jii oryndalatyn Gaýhar Álimbekovanyń «Aq kelin» ánindegi keibir joldar synǵa alyndy. Atap aitqanda:
«Aldymenen ózińdi eneń synar,
Eneńdei bol bul synǵa emen shydar.
Jas kelinge qattyraq qaraǵany,
Shiratyp bir alaiyn degen shyǵar».
Pikir bildirýshiler bul joldarda jas kelinge qoiylatyn talap pen ene tarapynan bolatyn qysym qalypty qubylys retinde kórsetilgenin alǵa tartty.
Sondai-aq toi men qudalyqta dombyra, baianmen jii oryndalatyn, halyq ánine ainalǵan «Qyz degeniń qonaq qoi ol qashanda» kompozitsiiasy da talqylandy.
«Qyz degeniń qonaq qoi ol qashanda,
Tóbesine-ai altyn qoiyp baqsań da.
Shańyraqqa ie bolyp qalatyn
Uldyń aty ul ǵoi shirkin qashanda».
Qyz-kelinshekterdiń pikirinshe, Erke Esmahannyń «Áiel baqyty» ániniń qaiyrmasynda da áieldiń ómirin otbasy aiasymen shekteitin túsinik bar.
«Sińilim, toqta, toqtashy,
Shekarań – úidiń qaqpasy.
Áieldiń baqyty, áieldiń baqyty –
Áieldiń baqyty – otbasy».
Shimán apanyń «Kelin bolsań inabatty» ánindegi:
«Sen, kelin bolsań inabatty,
Úlkenderdi syila qatty.
«Áýlet» degen ǵimaratty
Kórkeitesiń, senemiz!»
degen joldary da osy turǵyda synǵa alyndy.
Al koých Roza Áshirbaeva ánshi Qanaidyń «Mama» ánindegi keibir sózderdi oǵash dep baǵalaǵan. Onyń nazar aýdarǵan joldary:
«Sózderiń, kózderiń keter emes oiymnan,
Buiyrsa sál shyda,
Jatyp alam qoinyńa».
Sonymen qatar Erkesh Hasenniń «Kóziń ádemi, sóziń ádemi, anamnan keiin óziń ádemi» degen joldary da ana men áieldiń konfliktisin týdyratyn án dep esepteidi.
Ernar Aidardyń «Unap qaldyń anama» ánindegi:
«Qandai baqyt anam seni unatsa,
Eń aldymen anam razy bolsa eken»,
sondai-aq:
«Kelin kerek anama,
Adal, dana»
degen joldar da nazardan tys qalmady.
«Red flag» dep atalǵan ánderdiń qatarynda «MýzArt» tobynyń «Farida» kompozitsiiasy da bar. Qoldanýshylar ándegi:
«Kelin bolsań aýylǵa, janym Fa-fa Farida,
Siyr saýyp, jún tútý – seniń moinyńda»
degen joldar qyzdardy tegin qyzmetshi kóretin «red flag» án dep esepteidi.
Al Erkin Nurjanovtyń:
«Júr degende júr, qal degende qal,
Basyń aýyrsa, balmen emdep al»
degen joldarynda áielden er adamnyń kóńilin tabý talap etiletini, al áieldiń qalaýy men saýlyǵy ózine ǵana kerek ekenin meńzeidi.
«Red flag» ánder qataryna sondai-aq myna oryndaýshylardyń ánderi kirdi:
Isa AliMýsa & Elaman Batyr - Bolashaq kelinshegim
Nurlan Ónerbaev - Ai men kún
Koba, Mans - Jaryq
Dana Kentai - Qyz baqyty
Zattybek Kópbosynov - Búldirgen
Asan Perdeshov - Apa
The kitchen songs - Kelin
Qanai - Úndeme
Alisher Qonysbaev - Ol arý
