Qazaqstan Halyq Keńesiniń músheleri Shahmurat Mútálip pen Gadji Gadjiev Kaspii teńizindegi oqý-jattyǵý kezinde qaza bolǵan áskeri qyzmetshilerdiń otbasylaryna qarjylai kómek kórsetiletinin málimdedi, dep habarlaidy ult.kz.
Kásipker, Qazaqstan boks federatsiiasynyń prezidenti Shahmurat Mútálip qaza bolǵan ár áskeri qyzmetshiniń otbasyna Integra Construction KZ kompaniiasy tarapynan 25 mln teńgeden beriletinin habarlady.
«Kómek ár otbasyǵa jeke-jeke kórsetiledi jáne bul memlekettik qoldaýǵa qosymsha beriledi», – dep jazdy Shahmurat Mútálip.
Ol Qazaqstan Halyq Keńesiniń múshesi ári kásipker retinde qaza bolǵandardyń otbasylarynyń qaiǵysyna ortaqtasýdy óziniń azamattyq mindeti sanaitynyn atap ótti.
«Árine, eshqandai aqsha ata-ananyń balasyn qaitara almaidy. Biraq osyndai qiyn sátte birde-bir otbasy qaiǵysymen jalǵyz qalmaýy kerek», – delingen onyń úndeýinde.
Qazaqstan Halyq Keńesiniń taǵy bir múshesi, Qazaqstan aýyr atletika federatsiiasynyń prezidenti Gadji Gadjiev te qaza bolǵan áskeri qyzmetshilerdiń otbasylaryna 100 mln teńge kóleminde materialdyq kómek kórsetý týraly sheshim qabyldaǵanyn málimdedi.
«Qazaqstan Halyq Keńesiniń múshesi jáne elimizdiń sport qaýymdastyǵynyń ókili retinde qaza bolǵan áskeri qyzmetshilerdiń otbasylaryna 100 mln teńge kóleminde materialdyq qoldaý kórsetý týraly sheshim qabyldadym», – dedi Gadji Gadjiev.
Eki Keńes múshesi de qaza bolǵan áskeri qyzmetshilerdiń týǵan-týystaryna, jaqyndary men qarýlastaryna kóńil aitty.
Eske sala keteiik, 24 qyrkúiekte Kaspii teńiziniń jaǵalaýynda oqý-jaýyngerlik mindetti oryndaý kezinde aýa raiy kúrt nasharlap, jeldiń kúsheiýinen áskeri qyzmetshilerdi teńizge alyp ketken.
Úkimettik komissiia naqtylaǵan málimet boiynsha, teńizge 17 áskeri qyzmetshi ketken. Olardyń 12-si qaza taýyp, úsheýi qutqaryldy. Qazir taǵy eki áskeri qyzmetshini izdeý jumystary jalǵasyp jatyr.
Qaiǵyly oqiǵaǵa qatysty qylmystyq is qozǵaldy. Oqiǵanyń barlyq mán-jaiyn anyqtaý úshin arnaiy jedel-tergeý toby quryldy.
Memleket basshysy Qasym-Jomart Toqaev Mańǵystaý oblysynda áskeri qyzmetshilerdiń qaza bolýyna bailanysty 25 qyrkúiekti Qazaqstanda jalpyulttyq aza tutý kúni dep jariialady.
