Aqtóbedegi áskeri bólimde soqqyǵa jyǵylǵanyn aitqan aqtaýlyq sarbazdyń ata-anasy ulyna bardy. Sarbazdyń anasy Gúldana Ketibaeva ulynyń jaǵdaiy aýyr ekenin aityp, onyń qatty aryqtap ketkenin jáne qazir katetermen jatqanyn jetkizdi, dep habarlaidy ult.kz.
Lada.kz jazýynsha, anasy ulynyń syrtqy kelbeti de qatty ózgergenin aitqan.
«Kózi shúńireiip, tym qatty aryqtap ketken. Kiimi de kir-qojalaq bolǵan. Tipti aýystyratyn kiimi de bolmaǵan. Fizikalyq jáne emotsionaldyq turǵydan ábden álsiregen», – dedi Gúldana Ketibaeva.
Onyń sózinshe, kezdesýden keiin áskeri bólim qyzmetkerleri sarbazǵa aýystyratyn kiim ákelgen.
Anasy ulynyń densaýlyǵyna qatysty da alańdaýshylyq bildirdi. Qazir sarbaz ózdiginen dáretke shyǵa almai, katetermen jatyr.
Kezdesý kezinde sarbaz anasyna shap tusynan soqqy alǵanyn aitqan. Anasynyń sózinshe, sodan keiin onyń densaýlyǵy nasharlap, dáretke shyǵýynda qiyndyq paida bolǵan.
Sondai-aq sarbazdyń anasy ulyna aýyrsynýyna bailanysty oryndai almaityn tapsyrmalar berilgenin, al tapsyrmany oryndamaǵany úshin qaitadan soqqyǵa jyǵylǵanyn málimdedi.
«Eki táýlik boiy dáretke shyǵa almaǵan. Sodan keiin ǵana ony Aqtóbe oblystyq aýrýhanasyna jetkizgen», – dedi ol.
Gúldana Ketibaevanyń aitýynsha, áskeri prokýratýra Qylmystyq kodekstiń 451-baby 1-bóligimen («Bilikti nemese laýazymdyq ókilettikterdi asyra paidalaný») qylmystyq is qozǵaǵan.
Atalǵan bap boiynsha aiyppul salý, túzeý jumystaryna tartý, bas bostandyǵyn shekteý nemese bes jylǵa deiin bas bostandyǵynan aiyrý jazasy qarastyrylǵan.
Sarbaz ózin urdy dep kórsetken serjanttardyń aty-jóni ázirge jariialanǵan joq. Anasy muny istiń tergelip jatqanyna bailanysty túsindirdi.
Qazir ol ulyn basqa áskeri bólimge aýystyrýdy emes, áskeri qyzmetten bosatýdy surap otyr.
«Munda budan bylai qyzmet etýiniń máni joq. Al kináliler zań boiynsha jazalanýy tiis», – dedi sarbazdyń anasy.
Qazirgi ýaqytta ata-anasy ulymen birge Aqtóbe oblystyq aýrýhanasynda.
Eske salaiyq, buǵan deiin Aqtóbede áskeri boryshyn ótep júrgen Aqtaýdyń 18 jastaǵy turǵyny Erbol Dosymbet aýrýhanaǵa túskeni habarlanǵan edi. Sarbaz áskeri bólimde ózin júieli túrde uryp-soqqanyn aityp, politsiiaǵa aryz jazǵan.
Ol anasymen beinebailanys kezinde ózin aǵa serjant pen taǵy eki serjant urǵanyn málimdegen. Keiin IIM 2026 jyldyń naýryzynda atalǵan jaǵdai boiynsha sotqa deiingi tergeý bastalǵanyn habarlady.
