Memleket basshysy Qasym-Jomart Toqaev «Ákimshilik ádilet jáne onyń quqyq ústemdigin qamtamasyz etý isindegi róli» atty halyqaralyq forýmda sóz sóilep, Qazaqstandaǵy ákimshilik ádilet júiesiniń nátijeleri men quqyqtyq reformalardyń mańyzyna toqtaldy, dep habarlaidy Ult.kz.
Prezidenttiń aitýynsha, «e-Ótinish» onlain platformasy memleket pen qoǵam arasyndaǵy bailanysty jańa deńgeige kóterip, azamattardyń ótinishterin ashyq ári tiimdi qaraýǵa múmkindik berdi.
«Sońǵy bes jyl ishinde memlekettik organdarǵa shamamen 16 million ótinishtiń kelip túsýi – sonyń aiqyn kórinisi», – dedi Memleket basshysy.
Qasym-Jomart Toqaev ákimshilik ádilet júiesi iske qosylǵannan keiin azamattardyń quqyqtaryn qorǵaý múmkindigi aitarlyqtai keńeigenin atap ótti. Onyń sózinshe, buǵan deiin memlekettik organdardyń sheshimderi men áreketterine shaǵymdaný qiyn bolsa, qazir kúmán týǵyzatyn máseleler azamattardyń paidasyna sheshilýge tiis qaǵidat qalyptasty.
Prezident sońǵy jyldary ákimshilik ister boiynsha shyǵarylǵan sot sheshimderiniń jartysynan astamy azamattar men biznestiń múddesine sai qabyldanǵanyn aitty.
«Osylaisha qoǵamdaǵy "sýdialar árdaiym bilik ókilderin jaqtaidy" degen qasań pikir birtindep ózgerip keledi», – dedi ol.
Memleket basshysy ákimshilik ádilettiń róli artyp kele jatqanyn aityp, jańa Konstitýtsiiada ákimshilik sot tóreliginiń sot isin júrgizýdiń derbes nysany retinde bekitilýi mańyzdy qadam bolǵanyn jetkizdi.
Forým barysynda investitsiialyq ahýal máselesi de kóterildi. Prezidenttiń aitýynsha, Qazaqstanda investorlardyń quqyqtaryn qorǵaý baǵytynda júieli jumys júrgizilýde. Sonyń nátijesinde investitsiialyq daýlar boiynsha sot sheshimderiniń shamamen 80 paiyzy investorlardyń paidasyna shyǵarylǵan.
Qasym-Jomart Toqaev bilik pen biznes arasyndaǵy dialogtyń mańyzyn erekshe atap ótti.
«Bilik jáne biznes ókilderi ózekti túitkilderdi ashyq talqylap, sheshý joldaryn birlese izdeýi qajet», – dedi Prezident.
Memleket basshysy Qazaqstannyń sheteldik investitsiia tartý kórsetkishi boiynsha óńirde kósh bastap turǵanyn málimdedi. Onyń aitýynsha, bul baǵyttaǵy jumystardy kúsheitý úshin jańa Konstitýtsiiaǵa investitsiialyq tartymdylyqty arttyrýǵa arnalǵan birqatar normalar engizilgen.
Prezident jaqynda qol qoiǵan «Alataý qalasynyń arnaýly quqyqtyq rejimi týraly» konstitýtsiialyq zańǵa da toqtalyp, bul qujat bolashaq tsifrlyq aglomeratsiiany qalyptastyrýǵa quqyqtyq negiz qalaitynyn aitty.
Sóz sońynda Qasym-Jomart Toqaev Qazaqstanda Zań men tártip qaǵidatyna negizdelgen Ádiletti Qazaqstandy qurý jumystary jalǵasatynyn málimdep, sot júiesiniń táýelsizdigin qamtamasyz etý memlekettiń basty basymdyqtarynyń biri ekenin atap ótti.
