Memleket basshysy Qasym-Jomart Toqaev Tý kóterý rásiminde sóz sóilep, qazaqstandyqtardy Memlekettik rámizder kúnimen quttyqtady. Bul Qazaq eliniń árbir azamaty úshin mańyzy erekshe mereke ekenin atap ótti, dep habarlaidy ult.kz.
"Eltańba – eldigimizdiń aishyqty belgisi. Ánuran – azattyǵymyzdyń aibyndy úni. Kók Týymyz – Táýelsizdik tumary. Tóbemizge kóterip, qadir tutatyn osy úsh rámizdi memlekettigimizdiń myzǵymas úshtaǵany desek, artyq bolmaidy", - dedi Prezident.
Memleket basshysy taiaý arada Úkimet memlekettik rámizderdi oryndy paidalaný máselesi boiynsha qaýlyǵa qajetti túzetýler engizetinin aitty.
«Jalpyhalyqtyq referendýmda qabyldanǵan Konstitýtsiia – Qazaqstannyń aldaǵy ondaǵan jyldarǵa arnalǵan basty zańy. Dál osy Ata zań halqymyzdy álemdik órkeniettiń jańa belesterine bastaidy. Elimizdiń bas qujaty – Konstitýtsiia 1 shildeden bastap kúshine enedi. Tamyz aiynda bir palataly Quryltai sailaýy ótedi, al qyrkúiekte Qazaqstan Halyq Keńesi qurylady", - dep eske saldy Prezident.
Memleket basshysy urpaqtar sabaqtastyǵyn saqtaýda belsendi jumys júrip jatqanyn aitty.
"Joshy han jerlengen Ulytaý aimaǵyna oblys mártebesi berildi. Elimizde Joshy ulysyn zertteý institýty quryldy. Biz bul mekemeniń ǵylymi áleýetin kúsheite beremiz. Kóp uzamai Qazaqstan tarihynyń jeti tomdyq akademiialyq eńbegi jaryqqa shyǵady. Onyń bir tomy túgeldei Altyn Orda taqyrybyna arnaldy", - dedi ol.
Qasym-Jomart Toqaev qazir Qazaqstanda berik ornyqqan prezidenttik basqarý úlgisi Altyn Orda kezinde qurylǵan saiasi júieden bastaý alatynyn eske saldy. Budan bólek, jańa Konstitýtsiiada qazaq eliniń tól shejiresi Uly dalanyń myńdaǵan jyldyq tarihy sabaqtas ekenin aiqyn kórsetilgen.
"Elordamyzda Uly dala órkenietine arnalǵan záýlim ǵimarat salynady. Jaqynda Astanada IýNESKO-nyń aiasynda Altyn Orda murasyn zertteý isine arnalǵan halyqaralyq simpoziým ótkizildi. Munyń bári memlekettigimizdiń tuǵyryn nyǵaita túsýge zor yqpal etedi. Altyn Orda óziniń basqarý institýttary, diplomatiialyq qyzmeti, bailanys jáne keden júiesi, álemde moiyndalǵan valiýtasy, ozyq innovatsiialary bar orta ǵasyrdaǵy alyp el boldy. Qazir Qazaqstanda berik ornyqqan prezidenttik basqarý úlgisi Altyn Orda kezinde qurylǵan saiasi júieden bastaý alady", - dedi Qasym-Jomart Toqaev.
Qazaqstan úshin Altyn Orda murasy – strategiialyq baǵdar.
"Altyn Ordanyń eń basty murasy – onyń myzǵymas qundylyqtary. Sebebi alyp memlekette dini, tili, mádenieti, dástúri bólek adamdar ortaq erejeler aiasynda tatý-tátti ómir súrdi. Babalarymyzdyń osyndai taǵylymdy joly biz úshin óshpes ónege jáne basty strategiialyq baǵdar bolyp qala beredi.
Altyn Ordanyń jetistigi Eýraziiadaǵy kóptegen halyqtyń ortaq igiligi sanalady. Sondyqtan Ulyq Ulystyń murageri retinde biz Eýraziianyń birtutastyǵyn, ósip-órkendegenin, ondaǵy memleketterdiń barlyǵy tatý-tátti ǵumyr keship, ortaq qaýipsizdikti saqtap, halyqtarynyń igiligi úshin qyzmet etkenin quptaimyz", - dedi Prezident.
