Astanada Kipr Respýblikasynyń Prezidenti Nikos Hristodýlidis resmi saparmen kelip, ony saltanatty túrde qarsy alý rásimi ótti, dep habarlaidy Ult.kz.
Is-shara barysynda Qazaqstan Prezidenti Qasym-Jomart Toqaev men Kipr basshysy delegatsiia múshelerin tanystyryp, eki eldiń memlekettik ánurandary oryndaldy.
Kelissózder aldymen shaǵyn quramda, keiin eki el delegatsiialarynyń qatysýymen keńeitilgen formatta jalǵasty.
Memleket basshysy Kipr Prezidentiniń Qazaqstanǵa alǵash ret resmi saparmen kelýin tarihi oqiǵa dep atap, sońǵy jyldary ekijaqty qarym-qatynasta eleýli nátijelerge qol jetkizilgenin aitty.
– Biz elshilikterimizdi ashtyq, eki memleket arasynda tikelei áýe reisi iske qosyldy. Degenmen ózara yntymaqtastyqty keńeitý úshin áleýetimiz áli de mol, – dedi Qasym-Jomart Toqaev.
Óz kezeginde Nikos Hristodýlidis Qazaqstanǵa Kiprden qatynaityn alǵashqy tikelei reispen kelgenin aityp, bul oqiǵanyń simvoldyq máni zor ekenin jetkizdi.
Kelissózder barysynda taraptar saýda-ekonomikalyq bailanystardy damytý, investitsiia tartý, kólik-logistika, tsifrlandyrý, jasandy intellekt, qarjy, týrizm jáne bilim berý salalaryndaǵy áriptestikti keńeitý máselelerin talqylady.
Qazaqstan Prezidenti eki el arasyndaǵy ekonomikalyq bailanystardy jandandyrý maqsatynda Ekonomikalyq yntymaqtastyqtyń 2028 jylǵa deiingi jol kartasyn ázirleýdi, úkimetaralyq komissiia men Iskerlik keńes qurýdy usyndy.
Kipr Prezidenti Qazaqstandy Eýropa Odaǵy úshin mańyzdy strategiialyq seriktes dep atap, kiprlik biznes ókilderiniń qazaqstandyq naryqqa qyzyǵýshylyǵy artyp kele jatqanyn málimdedi.
Kelissóz qorytyndysynda taraptar saýda, investitsiia, tsifrlyq kommýnikatsiia, jasandy intellekt jáne qarjy salalaryndaǵy yqpaldastyqty nyǵaitýǵa, sondai-aq mádeniet, bilim, sport jáne týrizm baǵyttaryndaǵy bailanystardy keńeitýge ýaǵdalasty.
