Memleket basshysy Qasym-Jomart Toqaevtyń tóraǵalyǵymen ótken Qaýipsizdik Keńesiniń otyrysynda Qazaqstannyń ǵarysh salasynyń qazirgi jaǵdaiy, júzege asyrylyp jatqan jobalary jáne damý perspektivalary qaraldy, dep habarlaidy ult.kz.
Jiynda Úkimet músheleri spýtniktik bailanys júieleri, ǵarysh infraqurylymy jáne salany odan ári damytý baǵytyndaǵy jumystar týraly baiandama jasady. Prezident ǵarysh salasynyń strategiialyq mańyzyn atap ótip, spýtniktik bailanys pen ǵarysh infraqurylymynyń turaqty jumysyn qamtamasyz etý qajettigin aitty.
Premer-ministrdiń orynbasary – Jasandy intellekt jáne tsifrlyq damý ministri Jaslan Mádiev spýtniktik júielerdi damytý, ǵarysh infraqurylymyn jańǵyrtý jáne ǵaryshtyq derekter negizinde qoldanbaly sheshimderdi engizý boiynsha iske asyrylyp jatqan jobalar týraly málimet berdi.
Memleket basshysy qazirgi tańda jahandyq ǵarysh sektory túbegeili ózgergenin atap ótti. Onyń aitýynsha, buryn tek iri memleketterdiń enshisinde bolǵan bul salaǵa búginde jeke kompaniialar da belsendi aralasyp, bailanys, navigatsiia, internet, monitoring jáne ǵylymi zertteýler baǵyttaryn damytyp jatyr.
Otyrysta sondai-aq ǵylymdy, onyń ishinde astrofizikany damytý máseleleri talqylandy. Prezident ulttyq tehnologiialyq jáne injenerlik áleýetti kúsheitýge baǵyttalǵan «Báiterek» jobasynyń júzege asyrylý barysyn oń baǵalady.
Budan bólek, halyqaralyq yntymaqtastyq máselesine toqtalǵan Qasym-Jomart Toqaev Reseimen jáne basqa da sheteldik seriktestermen strategiialyq áriptestikti odan ári nyǵaitýdyń mańyzyn aitty. Sonymen qatar Baiqońyr qalasy men oǵan irgeles aýmaqtardaǵy turǵyndardyń áleýmettik-turmystyq jaǵdaiyn jaqsartý qajettigine nazar aýdardy.
Jiyn qorytyndysynda Prezident Úkimetke ǵarysh salasyn jańǵyrtý jáne onyń áleýetin memleket múddesine tiimdi paidalaný boiynsha birqatar naqty tapsyrma berdi.
