Memleket basshysy Qasym-Jomart Toqaev Qazaqstannyń jańa Konstitýtsiiasynyń zańdy kúshine enýine orai halyqqa úndeý jasap, bul kúndi el tarihyndaǵy jańa kezeńniń bastaýy dep atady, dep habarlaidy ult.kz.
"Qurmetti otandastar!
Jańa Konstitýtsiiamyzdyń zańdy kúshine enýi – búkil elimiz úshin airyqsha mańyzdy oqiǵa. Barshańyzdy shyn júrekten quttyqtaimyn!
Búgin táýelsiz Qazaqstan tarihynyń jańa dáýiri bastalady. Biz saiasi-ekonomikalyq reformalardyń, aýqymdy ózgeristerdiń jáne qarqyndy damýdyń dańǵyl jolyna túsemiz.
Osy erekshe kún elimizdiń búkil saiasi júiesin, sondai-aq memlekettiń jáne azamattyq qoǵamnyń negizgi institýttaryn túbegeili jańǵyrtý kezeńi bastalǵanyn ańǵartady.
15 naýryzda ótken jalpyulttyq referendýmda Qazaqstan halqy el taǵdyryna tikelei yqpal etetin jáne memlekettiń ondaǵan jyldarǵa arnalǵan damý baǵdaryn aiqyndaityn tańdaýyn jasady. Milliondaǵan otandasymyz berekeli birlik tanytyp, shynaiy otanshyldyq pen joǵary jaýapkershiliktiń ozyq úlgisin kórsetti. Bul tarihi sheshimniń tól shejiremizde altyn árippen jazylatyny anyq.
Budan bylai Konstitýtsiia kúni «Naýryznama» onkúndigimen qatar atalyp ótedi. Munyń simvoldyq máni zor. Konstitýtsiia kúni el ishinde ǵasyrlar boiy ornyqqan kóktemgi jańarý dástúrlerin Ata zańnyń basty qaǵidattarymen toǵystyrady, iaǵni azamattarymyzdyń yrysty yntymaqqa, ozyq bilimge, el igiligi jolynda adal eńbek etýge degen talpynysymen úndesedi.
Biz naǵyz Halyq Konstitýtsiiasynyń myzǵymas quqyqtyq negizine arqa súiep, barlyq maqsat-murattarymyzǵa mindetti túrde jetemiz. Zań men Tártip, Eńbeksúigishtik pen Órleý, Tazalyq pen Tabiǵatty aialaý syndy jasampazdyq qundylyqtaryn qoǵamda berik ornyqtyramyz. Buǵan esh kúmánim joq.
Biz birligi bekem, birtutas ult retinde álemdik órkeniettiń shyńyn baǵyndyryp, barshaǵa birdei múmkindik beretin jáne barlyq azamattyń jan-jaqty damýyna jol ashatyn memleketti – Ádiletti Qazaqstandy quramyz!
Qasterli Otanymyzdy kórkeitý jolyndaǵy josparlarymyzdy oidaǵydai oryndaimyz. Men buǵan kámil senemin!
Qazaqstan Respýblikasy jasai bersin!
Halqymyz máńgi jasasyn!", - delingen úndeýde.
