Qaskeleń qalasyndaǵy perzenthanada dúniege kelgen shala týǵan úshem shetinep ketti. Qara jamylǵan otbasy oqiǵanyń mán-jaiyn jan-jaqty tekserip, kinálilerdi jaýapqa tartýdy talap etip otyr. Bul týraly KTK telearnasy habarlady, dep habarlaidy ult.kz.
Telearna málimetinshe, 28 jastaǵy júkti áiel ótken juma kúni júktiliktiń 25-aptasynda qaǵanaǵy jarylyp, Qaskeleńdegi perzenthanaǵa jetkizilgen. Dárigerler tolǵaq shaqyryp, áieldi tabiǵi jolmen bosandyrý týraly sheshim qabyldaǵan.
Marqum sábilerdiń ájesi Gúljámila Tóleshovanyń aitýynsha, otbasy áieldi kópbeiindi ortalyqqa jiberip, kesar tiligin jasaýdy suraǵan. Alaida dárigerler muny qajet dep sanamaǵan.
Onyń sózinshe, tańǵy saǵat jeti shamasynda úshem dúniege kelgen. Biraz ýaqyttan keiin dárigerler alǵashqy eki náresteniń shetinep ketkenin habarlaǵan. Al otbasy úshinshi sábi aman qalǵan dep oilaǵanymen, keiin onyń da kóz jumǵany belgili bolǵan.
Týystary dárigerler úshinshi náresteniń qaitys bolǵanyn birden habarlamaǵanyn aityp, bul jaǵdaiǵa túsinikteme berýdi talap etýde.
Sondai-aq olar júktilik bes aiǵa deiin qalypty ótkenin, áieldiń dárigerlerdiń baqylaýynda bolyp, qajetti em-domdy tolyq qabyldaǵanyn jetkizdi.
Qaiǵyly jaǵdaidan keiin otbasy shaqalaqtardy jer qoinyna tapsyrǵan. Alaida olar oqiǵanyń naqty sebebin anyqtaý úshin eksgýmatsiia júrgizýdi jáne táýelsiz tekseris uiymdastyrýdy surap otyr.
Óz kezeginde Qarasai klinikalyq kópbeiindi ortalyq aýdandyq aýrýhanasy júktiliktiń 25-aptasynda úshemdi bosandyrý asa aýyr ári shuǵyl meditsinalyq kómekti qajet etetin jaǵdai ekenin málimdedi.
Mekeme málimetinshe, úsh náreste de óte tómen salmaqpen dúniege kelgen. Salmaǵy 500 gramǵa deiingi shala týǵan sábiler ekstremaldy tómen salmaq sanatyna jatady, mundai jaǵdaida olardyń ókpesi men ortalyq júike júiesi tolyq jetilmeidi.
Aýrýhanada atalǵan oqiǵa boiynsha kórsetilgen meditsinalyq kómektiń sapasyna ishki qyzmettik aýdit júrgizilip jatqanyn habarlady.
Qazirgi ýaqytta úsh sábiinen aiyrylǵan ana perzenthanada em qabyldap jatyr. Bul onyń úshinshi júktiligi bolǵan. Erli-zaiyptynyń buǵan deiin eki balasy bar. Otbasy qaiǵyly oqiǵaǵa qatysty jan-jaqty tergeý júrgizilip, jaýapty tulǵalardyń zań aldynda jaýap berýin talap etip otyr.
