Qostanaida turǵyn úi qurylysyna azamattardan zańsyz aqsha tartqan qurylys kompaniiasynyń basshysyna qatysty sot úkimi shyqty, dep habarlaidy ult.kz.
Oblystyq prokýratýranyń baspasóz qyzmetiniń málimetinshe, kompaniia direktory qajetti ruqsaty bolmasa da, 2022 jyldyń sáýirinen 2024 jyldyń qarashasyna deiin azamattarmen páter satyp alý týraly sharttar jasap, 123 mln teńgeden astam qarjy jinaǵan. Qurylysty aiaqtaý múmkin emestigin bile tura, aqsha qabyldaýdy jalǵastyrǵan.
Nátijesinde ondaǵan otbasy baspanasyz qalǵan. Sot protsesi kezinde jábirlenýshilerge keltirilgen shyǵyn tolyq óteldi.
Sot kompaniia basshysyn alaiaqtyq jasaǵany úshin kináli dep tanyp, oǵan shartty túrde bas bostandyǵyn shekteý jazasyn taǵaiyndady. Sonymen qatar, ol 5 jyl boiy qurylys uiymdarynda basshylyq qyzmet atqara almaidy.
Prokýratýra turǵyn úige aqsha salmas buryn qurylys salýshynyń qajetti ruqsattary men qarajat tartý zańdylyǵyn tekserýge shaqyrdy.
