Qaraǵandyda ózin "emshi" ári "balger" retinde tanystyrǵan úsh áiel 78 jastaǵy zeinetkerdi aldap, onyń 15 million teńge turatyn altyn buiymdary men aqshasyn iemdenip ketken. Bul týraly IIM habarlaidy, dep jazady ult.kz.
Politseiler kúdiktilerdi jedel-izdestirý sharalary barysynda qolǵa túsirdi.
Oqiǵa ótken jyldyń jeltoqsan aiynda bolǵan. Úiine qaityp bara jatqan qariiaǵa kóshede úsh beitanys áiel jolyǵyp, áńgimege tartqan. Alǵashynda olar stomatologiiaǵa aparatyn joldy surap, keiin zeinetkerdiń senimine kirip, psihologiialyq qysym kórsetýge kóshken.
Kúdiktilerdiń biri áielge "jaqyn adamy salǵan eski qarǵys bar" ekenin aityp, eger ony dereý qaitarmasa, ózine qymbat adamnyń ómirine qaýip tónetinin jetkizgen. Osyndai úreili sózderge sengen zeinetker alaiaqtardyń árbir nusqaýyn buljytpai oryndaǵan.
Oqi otyryńyz: Toida ýaǵyz aitqan adamnyń ústinen UQK-ge aryz tústi
Áielder aldymen "tazartatyn ine" satyp alýdy usynyp, túrli yrym-joralǵylardy jasaǵan. Keiin úiinen shiki jumyrtqa ákelýdi surap, sońynda qarǵystan arylý úshin barlyq altyn buiymdary men aqshasyn gazetke orap berýdi talap etken. Óz kezeginde olar mórlengen túiinshek ustatyp, ony 40 kún ótken soń ǵana ashyp, ishindegisin órtep, kúlin sol jerge ákelý kerektigin aitqan.
Alaida sol túni-aq kúmándanǵan zeinetker túiinshekti ashyp kórgende, ishinde bos qaǵaz ǵana jatqanyn anyqtaidy. Osylaisha jalpy quny 15 million teńgeni quraityn altyn áshekeileri men jinaǵan qarajaty qoldy bolǵan.
Jábirlenýshiniń bergen naqty sipattamalarynyń arqasynda Qaraǵandy oblysy politsiia departamentiniń kriminaldyq politsiia qyzmetkerleri kúdiktilerdiń izine tústi. Tergeý barysynda olardyń Pavlodar jáne Almaty qalalarynyń, sondai-aq Jetisý oblysynyń turǵyndary ekeni jáne osyǵan uqsas alaiaqtyq áreketterge buryn da qatysy bolýy múmkin ekeni anyqtaldy.
Tirkelgen mekenjailary boiynsha júrgizilgen izdestirý jumystary nátije bermegenimen, jedel aqparat negizinde kúdiktilerdiń Temirtaý qalasynda júrgeni belgili bolyp, olar ustaldy. Keiin jábirlenýshi olardy Qaraǵandy qalasynyń Qazybek bi atyndaǵy politsiia bóliminde tanydy.
Qazirgi ýaqytta atalǵan derek boiynsha qajetti tergeý áreketteri júrgizilýde. Kúdiktiler ýaqytsha ustaý izoliatoryna qamaldy.
Politseiler azamattardy ózin balger, emshi nemese kóripkel retinde tanystyryp, "qarǵysty qaitaramyz", "kóz tiemdi ketiremiz" degen jeleýmen aqsha nemese baǵaly zattardy talap etetin adamdarǵa senbeýge shaqyrady. Mundai jaǵdaida birden politsiiaǵa habarlaý qajet.
