Astana qalasyndaǵy memlekettik balabaqshalardyń birine jańadan basshylyq qyzmetke taǵaiyndalǵan meńgerýshi Qazaqstan Respýblikasynyń «Pedagog mártebesi týraly» zańy, Eńbek kodeksi, «Derbes derekter jáne olardy qorǵaý týraly» zańy jáne mektepke deiingi uiymdardyń terrorizmge qarsy qorǵalý talaptaryn buzǵany úshin qyzmetinen bosatyldy, dep habarlaidy ult.kz Astana qalasy Bilim basqarmasyna silteme jasap.
Atap aitqanda, balabaqsha meńgerýshisi pedagogterdi olardyń negizgi eńbek fýnktsiiasyna jáne laýazymdyq mindetterine qatysy joq jumystarǵa tartqan.
Sonymen qatar, mektepke deiingi uiym obektisiniń terrorizmge qarsy qorǵalý talaptaryn buzý faktisi anyqtaldy. Atap aitqanda, bógde adamnyń tiisti ruqsatsyz jáne baqylaýsyz balabaqsha aýmaǵyna kirýine jol berilgen.
Tekserý barysynda atalǵan adamnyń balabaqsha meńgerýshisimen buryn zańdy nekede bolǵan jubaiy ekeni anyqtaldy. Alaida onyń uiym qyzmetine qatysýyna quqyqtyq negiz beretin eńbek sharty nemese ózge de tiisti kelisim bolmaǵanyna qaramastan, ol balabaqsha qyzmetkerleriniń derbes derekterine ruqsatsyz qol jetkizgen.
Qazaqstan Respýblikasynyń «Derbes derekter jáne olardy qorǵaý týraly» zańynyń talaptaryna sáikes derbes derekterdi jinaý, óńdeý, saqtaý jáne olarǵa qol jetkizý zańnamada belgilengen tártippen júzege asyrylýy tiis.
Atalǵan faktiler balabaqsha ádiskeriniń jáne kúndizgi kúzet qyzmetkeriniń túsiniktemelerimen, sondai-aq beinebaqylaý kameralaryndaǵy jazbalardy zerdeleý nátijesinde rastaldy.
Tekserý qorytyndysy boiynsha balabaqsha meńgerýshisi tarapynan qyzmetkerlerdiń derbes derekterin bógde tulǵaǵa ruqsatsyz usyný, taratý jáne olarǵa qoljetimdilikti qamtamasyz etý faktileri anyqtaldy.
Anyqtalǵan buzýshylyqtardy eskere otyryp, balabaqsha meńgerýshisimen eńbek sharty buzylyp, ol atqaratyn qyzmetinen bosatyldy.
