Qaraǵandy turǵynynyń politsiia qyzmetkerin soqqyǵa jyqqany úshin shyqqan úkimge qatysty daý týyndady. Bul týraly Patriot telegram arnasy jazady, dep habarlaidy ult.kz.
Arnanyń málimetinshe, Magamed Gagiev qarjylyq piramidaǵa qatysty qylmystyq is boiynsha kúdikti retinde qamaýda otyrǵan azamattyq jubaiyna kezdesýge kelgen. Alaida sol kúni advokattar men qoǵamdyq qorǵaýshylardyń kóp bolýyna bailanysty kezdesýge arnalǵan kabinetter bos bolmai, kezdesý keiinge shegerilgen. Osydan keiin Gagiev pen tergeý izoliatorynyń rejim jáne kúzet bóliminiń qyzmetkeri Ásel Jambaeva arasynda janjal shyqqan. Kýágerlerdiń aitýynsha, er adam politsiia qyzmetkerin iterip, keiin onyń bet tusynan urǵan. Soqqydan qyzmetker qulai jazdaǵan.
Patriottyń jazýynsha, oqiǵa kezinde Gagiev shartty túrde merziminen buryn bosatylǵan.
Ol buǵan deiin Temirtaýdaǵy túngi klýbta adam óltirgeni úshin sottalǵan bolatyn.
Birinshi satydaǵy sot ony «bilik ókiline kúsh qoldanǵany úshin» jáne burynǵy jazasynyń ótelmegen bóligin eskere otyryp, 5 jylǵa bas bostandyǵynan aiyrǵan.
Alaida keiin apelliatsiialyq sot isti qaita qarap, aiypty «bilik ókiline kúsh qoldaný» babynan 109 bapqa, «densaýlyqqa jeńil ziian keltirmegen uryp-soǵý» babyna aýystyrǵan. Sonyń nátijesinde sottalǵan azamatqa qoǵamdyq jumystar taǵaiyndaldy. Tergeý kezinde qamaýda bolǵan merzimi jaza retinde eseptelip, bostandyqqa shyqqan. Bul sheshimdi kassatsiialyq sot alqasy da ózgerissiz qaldyrǵan.
Qazirgi ýaqytta politsiia qyzmetkeri Ásel Jambaeva men onyń qorǵaýshysy Artem Shedogýbov apelliatsiialyq jáne kassatsiialyq sottardyń sheshimderin ádiletsiz dep esepteidi. Olar Bas prokýratýradan istiń mán-jaiyn qaita qarap, birinshi satydaǵy sot úkimin kúshinde qaldyrýdy surap otyr.
