Qamalladin University men Joǵary bilim berýdi damytý ulttyq ortalyǵy mikro-biliktilikti damytý jáne praktikalyq baǵyttaǵy bilim berý máseleleri boiynsha yntymaqtastyq týraly memorandýmǵa qol qoidy, dep habarlaidy ult.kz.
Memorandým aiasynda Ulttyq ortalyq Qamalladin University-ge onyń baǵdarlamalaryn Qazaqstannyń ulttyq biliktilik júiesi men kásibi standarttaryna sáikestendirý máseleleri boiynsha konsýltatsiialyq qoldaý kórsetpek.
Sonymen qatar taraptar mikro-biliktilikter taqyrybynda dóńgelek ústelder men jumys toptaryn birlesip ótkizýdi josparlap otyr. Sondai-aq praktikalyq baǵdarlamany joǵary bilim berý baǵdarlamasyna kiriktirý múmkindikteri qarastyrylady.
Mikro-biliktilik — qysqa merzimdi oqý nátijesinde alynatyn jáne belgili bir eńbek fýnktsiiasyn oryndaýǵa jetkilikti bilim, daǵdy men quzyretter jiyntyǵy. Qazaqstannyń joǵary bilimdi jáne ǵylymdy damytýdyń 2023–2029 jyldarǵa arnalǵan tujyrymdamasynda bilim alýshylarǵa barlyq deńgeide mikro-biliktilikter alý múmkindigin damytý kózdelgen.
Bul baǵyt boiynsha 2026 jyly da jumys jalǵasyp jatyr. Mamyr aiynda mikro-biliktilik uǵymyn zańnamalyq turǵydan bekitý jóninde usynystar ázirleý úshin arnaiy jumys toby qurylǵan. Onyń quramyna bilim berý jáne kásibi biliktilik salasyndaǵy memlekettik organdardyń ókilderimen qatar, Ulttyq joǵary bilimdi damytý ortalyǵy, kolledjder men joǵary oqý oryndarynyń basshylary kirdi.
Qamalladin University óz kezeginde memorandýmnyń joǵary bilim berý uiymy mártebesin bermeitinin atap ótti. Qujat qarjylyq nemese múliktik mindettemeler týyndatpaidy. Sondai-aq memorandýmnyń ózinde Qamalladin University-diń joǵary bilim týraly diplom bermeitini kórsetilgen.
Kompaniianyń resmi saitynda Qamalladin University bilim berý baǵdarlamalaryn qysqa merzimde praktikalyq daǵdylardy meńgerýge baǵyttaitynyn kórsetedi.
Memorandým taraptardyń pikirinshe, Qazaqstandaǵy formaldy emes bilim berýdi taný jáne ony joǵary bilim berý júiesimen bailanystyrý baǵytyndaǵy jumystyń bastamasy bolmaq.
