Úkimet Soltústik Qazaqstan oblysyndaǵy aýyldardy sapaly aýyz sýmen qamtamasyz etý úshin Arnaýly memlekettik qordan 2,7 mlrd teńge bóldi. Qarajat Presnov jáne Sokolov toptyq sý qubyrlaryn qaita jańǵyrtý jumystaryn aiaqtaýǵa baǵyttalady, dep habarlaidy ult.kz.
Presnov toptyq sý qubyrynyń rekonstrýktsiiasy Esil, Mamliýt jáne Jambyl aýdandaryndaǵy 43 eldi mekendegi 34,5 myń turǵynnyń sýǵa qoljetimdiligin jaqsartady. Qazirdiń ózinde 171 shaqyrym magistraldyq sý qubyry men taratý jelileri, sondai-aq 46 shaqyrym aýylishilik sý jelisi tartylǵan. Sonymen qatar sý jinaý, taratý jáne qysymdy turaqtandyrýǵa arnalǵan nysandardyń qurylysy men jańǵyrtýy jalǵasyp jatyr.
Al Sokolov toptyq sý qubyry Qyzyljar aýdanyndaǵy 10 aýyldy qamtidy. Joba aiasynda 59 shaqyrym taratý jelisi men 77 shaqyrym aýylishilik sý jelisi salynady. Eki nysandy da 2026 jyldyń sońyna deiin paidalanýǵa berý josparlanyp otyr.
Jobalar iske qosylǵannan keiin sýmen jabdyqtaý júiesiniń senimdiligi artyp, sý tasymaldaý kezindegi shyǵyndar azaiyp, turǵyndarǵa aýyz sý jetkizý sapasy jaqsarady.
Aita keteiik, Soltústik Qazaqstan oblysynda uzyndyǵy 3 myń shaqyrymnan asatyn elimizdegi eń iri toptyq sý qubyrlary jelisi ornalasqan. Ol 229 aýyldaǵy 175 myń turǵyndy sýmen qamtamasyz etedi. Al 2024–2026 jyldary Arnaýly memlekettik qor esebinen jalpy quny 610 mlrd teńgeden asatyn 500-den astam áleýmettik jobany qarjylandyrý maquldanǵan. Onyń 267-si sý infraqurylymyn damytýǵa baǵyttalǵan, jalpy quny – 226,5 mlrd teńge.
