Sýret: kadrlardan úzindi
Eki jyl buryn qaza tapqan merzimdi sarbaz Almas Shahimovtyń týystary eksgýmatsiia jasatyp alty ai kútkennen soń, saraptama nátijesimen bólisti. Olardyń kúdikteri rastalyp, saraptama nátijesinde sarbazdyń denesinen pyshaq jaraqaty men túrli aiaýsyz soqqylardyń izi anyqtaldy. Bul týraly "Ult aqparat" Stan.kz aqparat agenttigine silteme jasap habarlaidy.
Almaty qalasynda áskeri boryshyn óteýge ketken Almas Shahimovtyń otbasyna eki aidan soń qaraly habar kelgen. Ol kezde ólimniń resmi sebebin jazataiym oqiǵa dep bergen. Sarbaz oqý jattyǵý kezinde ózgelerge qaýipsiz jerge barýǵa kómektesip, ózi qatty daýyldyń áserinen qulaǵan metal jabdyqtyń astynda qalyp, mert boldy delingen.
“Alǵashynda bizde kóptegen aiǵaq dálelder bolǵandyqtan eksgýmatsiia jasatýǵa qarsy boldyq. Alaida áskeriler keiin barlyq aiǵaqtardy, ulymnyń áskeri kiimderin, poligondaǵy beinejazbalardyń bárin joidy” , – dedi Almastyń anasy.
Derekterge súiensek osynsha ýaqyt ótkennen soń marqumnyń týystarynyń kúdikteri rastalǵan.
“Máiit saraptamasynan oń jaǵynan úsh pyshaq jaraqaty, qylqyndyrǵan izder, 26 dene jaraqaty anyqtalǵan. Onyń búiregin ezip, bas súiegin syndyryp, temekini arqasyna basyp, sóndirgen”, – dep qosty anasy.
Odan bólek, anasynyń aitýynsha, Almas baǵynyshty bolǵan ofitser áskerge qabyldana sala jigittiń atyna nesie alǵyzǵan.
“Almasty áskerge kózine ota jasalǵan soń birden alyp ketti. Olar dárigerlerdiń otadan soń jarty jyl fizikalyq kúsh salýǵa bolmaidy degen tyiymyna qaramady. 27 mamyr ony alyp ketti. Mamyrdyń 28-i kúni ulym Almatyǵa jetti. 29-da áskeri bólimine jetip, 30-da onyń atyna nesie rásimdelgen”, – dedi anasy.
Almastyń otbasy eki jyldan beri ádildik úshin kúresken. Tipti olarǵa áskerilerdiń ózi materialdyq ótemaqy tóleitinin, aqsha, páter men kishi qyzdaryn oqýǵa túsirýdi usynǵan.
Ulttyq gvardiia tipti sarbazǵa erligi úshin marapat ta bergen. Alaida jaqyndary bul marapattan bas tartqan. Sebebi olar Almastyń shańdy daýyldan ózgelerdi qutqaryp emes, bireýdiń qolynan mert bolǵanyna senimdi.
Eske salsaq, buǵan deiin Almatyda boryshyn ótep júrgen sarbazdyń qumdy daýyl kezinde kóz jumǵany týraly habarlaǵan edik. 5574 áskeri bóliminde boryshyn ótep júrgen sarbaz oqý ortalyǵynda dalalyq jattyǵýda bolǵan kezde kóz jumǵan. Vedomstvo málimetine sáikes, qatty jel saldarynan shatyrdyń temir jaqtaýy basyna tigen.
