Resei Prezidentiniń baspasóz hatshysy Dmitrii Peskov koronavirýs juqtyryp, em alyp jatqanyn rastady, dep habarlaidy "Ult aqparat" TASS agenttigine silteme jasap.
Ol «Shynymen koronavirýs juqtyrdyńyz ba?» degen suraqqa: «Iá, syrqattanyp qaldym. Emdelip jatyrmyn» dep jaýap berdi.
Buǵan deiin «Nezygar» Telegram-arnasy Prezidenttiń baspasóz hatshysynyń koronavirýs juqtyrýy múmkin ekenin habarlaǵan.
Peskov - prezident Pýtinge eń jaqyn sheneýniktiń biri. Ol kúndelikti Pýtinniń jáne Kremldiń málimdemelerine konferents-koll arqyly jýrnalisterge pikir bildirip júrgen. Peskovtyń sońǵy ret qashan Pýtinmen jolyqqany belgisiz. Belgilisi, Pýtin qazir Novo-Ogorevtegi rezindentsiiasynda jáne kezdesýleriniń kóbin qashyqtan ótkizip jatyr.
Sáýirde Peskov jurt aldyna "virýs ótkizbeitin blokatormen" shyqqan. Bul "blokatordyń" virýstan qorǵai alatyny dáleldenbegen.
Aita keteiik, Resei Premer-ministri Mihail Mishýstin, Qurylys jáne turǵyn úi-kommýnaldyq sharýashylyq ministrliginiń basshysy Vladimir Iakýshev jáne Mádeniet ministri Olga Liýbimovadan koronavirýs anyqtalǵan edi.
Mishýstin 30 sáýirden beri meditsinalyq mekemede dárigerlerdiń baqylaýynda jatyr, dárigerler onyń jaǵdaiy qalypty ekenin aitty.
Resei virýs juqtyrǵandar sany jóninen álemde ekinshi orynǵa shyqty. Bul elde 232 myńnan astam adamnan virýs tabyldy. Eki myńnan astam adam qaitys boldy. Biraq Financial Times basylymy Reseide COVID-19 virýsynan qaza tapqandar sany resmi málimetten áldeqaida kóp dep esepteidi.
