AQSh memlekettik hatshysy Maik Pompeo Reseige 2020 jyly ótetin prezident sailaýyna kilikpeýdi eskertti. Resei syrtqy ister ministri Sergei Lavrov Vashingtonnyń Venesýelada jańa úkimet qurý umtylysyn AQSh-tyń Iraktaǵy áskeri kampaniiasyna teńestirdi. Pompeo men Lavrov mundai pikirdi 14 mamyrda Sochi qalasyndaǵy kezdesýden keiingi birlesken baspasóz jiynynda aitty.
AQSh prezidenti Donald Tramp arnaýly prokýror Robert Miýllerdiń zertteýinen soń Máskeýmen aradaǵy qatynasty jaqsartýǵa umtyla bastady. Mamyrdyń basynda Tramp telefon arqyly Miýllerdiń zertteýin Resei prezidenti Vladimir Pýtinmen talqylaǵan.
13 mamyrda AQSh prezidenti maýsym aiynda Japoniiada ótetin "Úlken jiyrmalyqtyń" sammitinde Pýtinmen kezdeskeli jatqanyn aitqan.
14 mamyrda Sochide Pompeomen kezdesken Pýtin "Máskeý men Vashingtonnyń qatynasyn tolyqtai qalypqa keltirýge úmittenemin. Tramptyń da sony qalaitynyna senemin" dedi. Pýtin 2016 jyly ótken AQSh prezident sailaýyna Reseidiń yqtimal aralasýyn zerttep, Tramp pen jaqtastarynyń máskeýlik sheneýniktermen yqtimal sóz bailasýyna dálel tappaǵan Miýllerdiń zertteýine qatysty pikir bildirdi. Ol tergeýge "beitarap" dep baǵa berdi.
Pompeo men Lavrovtyń úsh saǵatqa sozylǵan kezdesýinen soń ótken baspasóz jiynynda Lavrov Máskeýdiń Vashingtonmen kezdesýge daiyn ekenin aitty. Biraq kezdesýdiń josparda bar-joǵyn aitqan joq.
