Túrkiia Prezidenti Rejep Erdoǵan men Resei Prezidenti Vladimir Pýtin Sochidegi kezdesýinde «Ankara men Máskeý Evfrat ózeninen shyǵysqa qarai Siriia men Túrkiia shekarasyn birge baqylaidy» degen ýaǵda jasasty.
Resei syrtqy ister ministri Sergei Lavrov oqyǵan kelisim mátini boiynsha, osydan eki apta buryn Túrkiia áskeri operatsiia júrgizgen 30 km shekara aimaǵyn túrik áskeri baqylaidy. 30 km aimaqtyń qalǵan bóligine Reseidiń áskeri politsiiasy kirgiziledi. Al kúrd qarýly jasaqtary bul aimaqtan ketedi.
Erdoǵan 22 qazanda Sochige baryp, Pýtinmen kelissóz júrgizgen. Alty saǵatqa sozylǵan kelissózdiń negizgi taqyryby - Túrkiianyń Siriia soltústigindegi áskeri operatsiiasy bolǵan.
Pýtinniń sózinshe, eki tarap Siriianyń soltústigindegi jaǵdaidy qalypqa túsirýge arnalǵan is-qimyldaryn kelisken. Bul kelisimdi Resei prezidenti «asa mańyzdy sheshim» dep atady.
Erdoǵannyń aitýynsha, Siriianyń Túrkiiamen irgeles aýmaǵyndaǵy «qaýipsiz aimaqqa» qazir Túrkiia aýmaǵynda júrgen Siriia bosqyndary ornalastyrylýy múmkin.
Túrkiia eki apta buryn Siriianyń soltústigindegi qarýly kúrd jasaqtaryna qarsy áskeri operatsiia bastaǵan. Erdoǵannyń AQSh vitse-prezidenti Maik Penspen kezdesýinen keiin jariialanǵan bes kúndik bitim ýaqyty aiaqtaldy. Seisenbi kúni kúrd jasaqtary Túrkiiamen irgeles aýmaqtan ketkenin málimdedi. Bul - Túrkiianyń áskeri operatsiiany toqtatý úshin qoiǵan shartynyń biri bolatyn.
Túrkiianyń áskeri operatsiiasy bastalar qarsańda Siriianyń Túrkiiamen shekarasy mańyn AQSh áskeri tastap shyqty. Kúrdter baqylaityn aýmaqtyń bir bóligine Resei qoldaityn Siriia prezidenti Bashar Asad áskeri kirdi.
