Resei prezidenti Vladimir Pýtin 7 qańtarda Siriia astanasy Damaskige ushyp bardy. Onyń ol jaqqa baratyny aldyn ala habarlanbady.
Kremldiń baspasóz hatshysy Dmitrii Peskovke silteme jasaǵan Reseidiń aqparat agenttikteriniń jazýynsha, Pýtin áýejaidan túse sala birden Reseidiń Siriiadaǵy áskeri komandalyq pýnktilerine barǵan. Onda Siriia prezidenti Bashar Asadpen kezdesken.
Peskovtiń aitýynsha, Pýtin "Siriianyń memlekettik jáne territoriialyq tutastyǵyn qalpyna keltirý jolynda óte kóp qadamdar jasalǵanyn" atap ótken. Asad Reseige kómekteskeni úshin alǵys aitqan.
Pýtinniń janynda Reseidiń qorǵanys ministri Sergei Shoigý bolǵan.
Pýtin Siriiaǵa Taiaý Shyǵysta jaǵdai ýshyqqan shaqta baryp otyr. Islam revoliýtsiiasy saqshylar korpýsynyń "Quds kúshteri" arnaiy jasaǵynyń qolbasshysy Súleimani 3 qańtarda Baǵdattaǵy AQSh-tyń áýe shabýyly kezinde mert bolǵan. Ony óltirýge AQSh prezidenti Donald Tramp tikelei buiryq bergen. "Quds kúshteri" Irannyń syrttaǵy áskeri operatsiialaryna qatysqan. Buǵan deiin AQSh-tan "kek alatynyn" málimdegen Iran 8 qańtarda AQSh-tyń Iraktaǵy birqatar nysandaryn zymyranmen atqylady.
Resei siiaqty Iran da qarýly oppozitsiiamen kúresip jatqan Bashar Asad áskerine qoldaý kórsetip keledi. Siriia aýmaǵynda "Islam memleketi" terroristik tobymen kúresýdi kózdegen AQSh odaqtastary - siriialyq kúrdter men Amerika áskerileri de bar. Olar eldiń shyǵys aýmaǵyna shoǵyrlanǵan. Pýtinniń issapary Súleimanige shabýyl jasalǵanǵa deiin josparlandy ma, joq pa, belgisiz.
8 qańtarda Resei prezidenti Túrkiiaǵa baryp, "Túrik aǵysy" gaz qubyrynyń ashylýyna qatysady.
- Siriiada azamattyq soǵys 2012 jyldan beri jalǵasyp keledi. Resei "terrorizmmen kúres" maqsatynda 2015 jyly 30 qyrkúiekte Siriiaǵa ásker kirgizgen. Asad áskeri Siriianyń basym bóligin baqylaýǵa ala aldy. Quqyq qorǵaýshylar Siriianyń úkimet kúshteri men Resei áskerileriniń operatsiiasy kesirinen beibit turǵyndar jappai qyryldy dep málimdegen.
- 2017 jyly jeltoqsan aiynda Siriiaǵa barǵan kezde Pýtin úkimet kúshteriniń jeńiske qol jetkizgenin aityp, Resei áskerin elden shyǵaratynyn málimdegen. Alaida áli kúnge deiin Siriiada Resei bazasy bar jáne reseilik sarbazdar áskeri operatsiialarǵa qatysyp keledi.
