Resei prezidenti Vladimir Pýtin sáýir aiynda qaterli isik aýrýynyń sońǵy satysyn emdeý kýrsynan ótti. Bul týraly Newsweek jýrnaly joǵary laýazymdy úsh derekkózge silteme jasai otyryp habarlady.
Amerikalyq jýrnaldyń jazýynsha, naýryz aiynda Resei basshysyna qastandyq jasaý áreketi de bolǵan.
Basylym málimetinshe, sáýirdiń aiaǵy men mamyrdyń ortasyna deiin Amerika barlaý qyzmeti Pýtin qatty aýyryp, tipti ólim aýzynda jatyr degen derekti tekserip, ortaq tujyrymǵa kelgen. Newsweek-tiń jazýyna qaraǵanda, ol koronavirýs indetin syltaý etip, oqshaýlaný arqyly dertin jasyrýǵa tyrysqan.
"Pýtinniń biligi myqty, biraq absoliýtti emes. Onyń Kremlde bilik qurǵan búkil ýaqytynda mundai qyzý kúres eshqashan bolǵan emes, barlyǵy munyń sońy jaqyndap qalǵanyn sezedi", – deidi jýrnal derekkózderiniń biri.
Jýrnalda jariialanǵan materialǵa qatysty pikir bildirgen AQSh qaýipsizdik keńesiniń ókili barlaýshylar arasynda Pýtinniń densaýlyǵyna qatysty qandai da bir tujyrym bar degen aqparat shyndyqqa janaspaitynyn aitty.
Sáýirdiń basynda "Proekt" basylymy 69 jastaǵy prezidentke sońǵy jyldary lor men hirýrg jii ushyp baryp júrgenin habarlaǵan. Egde kisilerdiń qalqansha bezindegi isikti osy mamandar emdeitini málim.
Pýtinge shabýyl jasalǵan bolýy múmkin degen málimetti mamyrdyń sońynda "Ýkrainskaia pravda" gazetine Ýkraina qorǵanys ministrligi bas barlaý basqarmasynyń basshysy Kirill Býdanov málimdegen. Sheneýnik bul shabýyl "shamamen eki ai buryn" jasalǵan dep esepteidi. Býdanov Resei prezidentin óltirý áreketi "óte sátsiz" bolǵan dedi.
Kreml ádette prezidenttiń densaýlyǵy týraly málimet taratpaidy. Alaida Pýtinniń baspasóz hatshysy Dmitrii Peskov "Proekt" aqparatyn "oidan qurastyrylǵan" dep atap, prezidenttiń deni saý ekenin málimdegen.
