14 aqpanǵa qaraǵan túni "Rossiia 24" telearnasy Resei prezidenti Vladimir Pýtinniń BAQ redaktorlarymen kezdesýinen video úzindi jariialady, dep habarlaidy Azattyq.
Kezdesý birneshe kún bolǵan. Bastapqyda jiynnyń "off the record" formatynda (aitylǵan áńgime jariialanbaitynyn bildiretin ereje. Batys basylymdarynda qoldanylatyn uǵym). Alaida birqatar BAQ pen kezdesýdiń ózge de qatysýshylary jiynnyń mazmunyn baiandap tastap, Kremldiń narazylyǵyna tap boldy.
Kezdesýdiń tolyq videosy jaryq kóre qoiǵan joq. Áńgime Pýtinniń kei sózderi jóninde órbip otyr.
Kezdesýdegi suraqtardyń biri Reseidegi keiingi narazylyqtar men Kreml synshysy Aleksei Navalnyidy qamtydy. Munyń aldynda jariialanǵan habarlarǵa qaraǵanda, bul suraqty "Eho Moskvy" basylymynyń bas redaktory Aleksei Venediktov qoiǵan.
Suraqqa jaýap bergen Pýtin ádetinshe Navalnyidyń atyn atamai, "figýrant" sózin qoldandy. Pýtinniń pikirinshe, Reseidiń sheteldegi qarsylastary Navalnyiǵa bás tikken.
"Bul bizde baǵzy zamannan, Goroh patshanyń kezinen kele jatyr. Qazir de bar, sál ary barsaq Birinshi dúniejúzilik soǵysqa daiyndyq jáne soǵysty júrgizý kezinde de bolǵan" dedi Pýtin Navalnyidy salystyryp otyrǵandardyń atyn atamai.
Degenmen ol narazylyqtyń obektivti sebepteri baryn moiyndady.
"Álemniń barlyq elinde, sonyń ishinde Reseide de adamdarda sharshaý, jinalyp qalǵan ashý-yza, narazylyq baiqalyp otyr. Buǵan turmys jaǵdaiy men tabys deńgeii de yqpal etip otyr" dedi ol.
Pýtinniń sózinshe, Reseidiń kei qarsylastary osy jaǵdaidy "paidalanbaq bolǵan. "Reseide ustap turý saiasaty" áldeqashan bastalǵan deidi ol.
Venediktovtyń aitýynsha, áńgime barysynda Navalnyidyń ýlanýy da qozǵalǵan. Biraq kezdesýdiń ol tusynyń videosy jariialanbady. Redaktordyń sózinshe, Pýtin burynǵy sózin qaitalap, reseilik dárigerlerdiń Navalnyi aǵzasynan ýlaǵysh zat tappaǵanyn aitqan, Batys elderin saraptama nátijesin Reseige bermei otyr dep synaǵan.
"Rossiia 24" telearnasy jariialaǵan video úzindilerdiń birinde Pýtin Donbass týraly suraqqa jaýap bergen. Russia Today telearnasynyń basshysy Margarita Simonian Ýkrainanyń "DHR" jáne "LHR" dep atalyp júrgen jerlerin Resei quramyna qosý-qospaý máselesin suraǵan. Pýtin ár qadamnyń saldaryn zerdeleý qajetin aityp, "Donbassty eshqashan tastamaimyz" deidi.
Pýtin sondai-aq "passionarlyq" teoriiasyna (Shamasy ol Lev Gýmilevtiń ǵylymi turǵyda daýly sanalatyn "Etnogenezdiń passionarlyq teoriiasyn" meńzegen) senetinin, bul teoriiaǵa sai "Reseidiń sharyqtaý shegine áli jetpegenin" aitty.
"Ózge kári ne qartaiyp jatqan ulttarǵa qaraǵanda biz ósip kele jatqan elmiz" dedi Pýtin.
