Resei Federatsiiasynyń Prezidenti Vladimir Pýtin el Konstitýtsiiasyna tiisti ózgertýler engizilgen jaǵdaida prezidentikke jańa merzimge óz kandidatýrasyn usynatynyn joqqa shyǵarmady. Ol bul týraly «Rossiia-1» telearnasynda kórsetilgen «Resei. Kreml. Pýtin» filmi úshin bergen suhbatta aitty, dep habarlaidy TASS agenttigi.
«Ózim úshin áli sheshim qabyldamadym. Eger Konstitýtsiiada múmkindik jasalsa, sailaýǵa túsýim týraly yqtimaldylyqty joqqa shyǵarmaimyn. Ony aldaǵy ýaqyt kórsetedi», - dedi ol.
Bul rette, V.Pýtin sheneýnikterge onyń izin basatyn adamdy qazirden izdep ketpei, óz jumystarymen ainalysýdy eskertti. «Izbasardy izdeýmen emes, jumyspen ainalysý qajet», - dedi RF basshysy.
Resei Prezidenti Konstitýtsiiaǵa ózgeris engizý usynysy óte oryndy ekenine senimdi.
«Qoldanystaǵy Konstitýtsiiaǵa túzetýler qabyldap jatqanymyz óte durys ekenine kámil senemin», - degen ol, sońǵy ailardaǵy oqiǵalar soǵan dálel bola alatynyn aityp ótti.
«Qazirgi Konstitýtsiia erekshe kezeńde – tankiler parlamentke oq jaýdyryp, Máskeýde qaqtyǵystar bolyp jatqan, ótkir ishkisaiasi daǵdarys jaǵdaiynda qabyldandy», - dep eske saldy ol.
