17 jeltoqsanda Máskeýde tikelei efir elementterimen baspasóz máslihatyn ótkizgen Resei prezidenti Vladimir Pýtin oppozitsioner Aleksei Navalnyidy ýlaǵandardyń artynda AQSh-tyń arnaiy qyzmeti tur dep málimdedi.
Jýrnalist suraǵyna jaýap bergen Pýtin Navalnyidyń atyn atamai, ony "Berlin emhanasynyń patsienti" dep qana sýrettedi. Ol Bellingcat jáne basqa da aqparat quraldary birlesken zertteýde aitylǵan boljamdy joqqa shyǵarmady. Zertteýshiler Navalnyidyń Reseidegi saparlary kezinde onyń ainalasynda Resei Federaldyq qaýipsizdik biýrosynyń adamdary júredi dep jazǵan edi. Pýtinniń aitýynsha, Resei arnaiy qyzmeti ókilderin AQSh arnaiy qyzmetiniń adamdary baqylap otyrady, sondyqtan olardyń telefon qońyraýlary nege tyńdalady dep tań qalýdyń keregi joq. Zertteýdiń ózin Pýtin shetel arnaiy qyzmetiniń aqparatyn zańdastyrý dep sipattady. Bul oppozitsionerdiń ózi de "AQSh arnaiy qyzmetiniń qoldaýyna súienedi" degenge meńzeidi, "demek bizdiń arnaiy qyzmetter oǵan bas-kóz bolýy kerek" dedi Resei basshysy. "Bul ony ýlaý kerek degen sóz emes. Ol kimge kerek ózi? Qalasaq, isti aqyryna deiin jetkizgen bolar edik" degen Pýtin Navalnyidy Germaniiada emdeýge jiberýge ózi ruqsat bergenin moiyndady.
Birneshe jyl buryn oppozitsiialyq saiasatker Boris Nemtsovty óltirýge qatysty suraqqa da Pýtin osyǵan uqsas jaýap qatqan. "Bul - kisini óltirý kerek degen sóz emes" degen edi ol.
Resei basshysynyń aitýynsha, Bellingcat jáne basqa uiymdar zertteýiniń basty maqsaty – ózin qoǵam aldynda Navalnyimen teńestirip kórsetý.
Zertteýde Navalnyi ainalasynda júrgen Federaldyq qaýipsizdik biýrosy adamdarynyń arasynda ýlaý boiynsha maman boldy degen boljam aitqan. Budan buryn germaniialyq mamandar oppozitsiialyq saiasatker Aleksei Navalnyi "Novichok" degen ýmen ýlanǵan degen qorytyndy jasaǵan. Navalnyi ózine qastandyq jasamaq boldy dep Pýtindi aiyptaǵan.
Biyl 20 tamyzda Tomskiden Máskeýge ushyp bara jatqan ushaqta Aleksei Navalnyidyń hali nasharlaǵan. Ushaq tótenshe jaǵdaimen Omsk qalasyna qonyp, jedel járdem qyzmeti saiasatkerdi aýrýhanaǵa alyp ketken. Sanaýly kúnnen soń es-tússiz Navalnyidy Germaniiaǵa jóneltti. Germaniialyq dárigerler naýqas arnaiy ýmen ýlanǵanyn aitty.
