5 sáýir kúni tańerteń Resei prezidenti Vladimir Pýtin men Soltústik Koreia basshysy Kim Chen Yn Vladivostoktaǵy Qiyr shyǵys federaldyq ýniversitetiniń ǵimaratynda kezdesti. TASS aqparat agenttiginiń habarlaýynsha, Pýtin Kimdi oqý ornynyń qurmetti qaraýyl qoiylǵan korpýsynan kútip alǵan.
Agenttik habarynsha, Soltústik Koreia lideriniń limýzini korpýs kireberisine taiap, eki el basshysy qol alysqan soń ǵimaratqa kirgen.
"Kelissózge ázirlengen zalǵa ene bergende Pýtin qonaqjai úi iesi retinde Kimge jol berip, óziniń oń jaǵyndaǵy oryndyqqa nusqady" dep jazady agenttik.
Pýtin men Kimniń aýdarmashylary ǵana qatysyp otyrǵan ońasha kezdesýine áýelde 50 minýt bólingenimen, kezdesý ótip jatqanyna bir saǵattan asty. Ońasha kezdesýden soń eki el basshynyń qataryna eki taraptyń birneshe ministri qosylady dep josparlanǵan. Biraq bul jiynǵa da baspasóz qatyspaidy.
Bul - Kim Chen Ynnyń Reseige alǵash saparlap kelýi.
"25 sáýirde ótetin kelissózdiń negizgi taqyryby Korei túbegindegi iadrolyq qarý máselesin diplomatiialyq jáne saiasi jolmen sheshý bolmaq" dep málimdedi 23 sáýirde Kreml ókili Iýrii Ýshakov. Onyń sózinshe, sońǵy kezderi túbektegi jaǵdai "rettelgen". Ýshakov "buǵan Soltústik Koreianyń iadrolyq qarýdy synaýyn doǵaryp, poligondy jabýy yqpal etti" deidi.
Reseidiń memlekettik RIA "Novosti" agenttiginiń jazýynsha, kezdesý kezinde qandai da bir qujatqa qol qoiý ne birigip málimdeme jasaý josparlanbaǵan.
