5 سەۋٸر كٷنٸ تاڭەرتەڭ رەسەي پرەزيدەنتٸ ۆلاديمير پۋتين مەن سولتٷستٸك كورەيا باسشىسى كيم چەن ىن ۆلاديۆوستوكتاعى قيىر شىعىس فەدەرالدىق ۋنيۆەرسيتەتٸنٸڭ عيماراتىندا كەزدەستٸ. تاسس اقپارات اگەنتتٸگٸنٸڭ حابارلاۋىنشا, پۋتين كيمدٸ وقۋ ورنىنىڭ قۇرمەتتٸ قاراۋىل قويىلعان كورپۋسىنان كٷتٸپ العان.
اگەنتتٸك حابارىنشا, سولتٷستٸك كورەيا ليدەرٸنٸڭ ليمۋزينٸ كورپۋس كٸرەبەرٸسٸنە تاياپ, ەكٸ ەل باسشىسى قول الىسقان سوڭ عيماراتقا كٸرگەن.
"كەلٸسسٶزگە ەزٸرلەنگەن زالعا ەنە بەرگەندە پۋتين قوناقجاي ٷي يەسٸ رەتٸندە كيمگە جول بەرٸپ, ٶزٸنٸڭ وڭ جاعىنداعى ورىندىققا نۇسقادى" دەپ جازادى اگەنتتٸك.
پۋتين مەن كيمنٸڭ اۋدارماشىلارى عانا قاتىسىپ وتىرعان وڭاشا كەزدەسۋٸنە ەۋەلدە 50 مينۋت بٶلٸنگەنٸمەن, كەزدەسۋ ٶتٸپ جاتقانىنا بٸر ساعاتتان استى. وڭاشا كەزدەسۋدەن سوڭ ەكٸ ەل باسشىنىڭ قاتارىنا ەكٸ تاراپتىڭ بٸرنەشە مينيسترٸ قوسىلادى دەپ جوسپارلانعان. بٸراق بۇل جيىنعا دا باسپاسٶز قاتىسپايدى.
بۇل - كيم چەن ىننىڭ رەسەيگە العاش ساپارلاپ كەلۋٸ.
"25 سەۋٸردە ٶتەتٸن كەلٸسسٶزدٸڭ نەگٸزگٸ تاقىرىبى كورەي تٷبەگٸندەگٸ يادرولىق قارۋ مەسەلەسٸن ديپلوماتييالىق جەنە ساياسي جولمەن شەشۋ بولماق" دەپ مەلٸمدەدٸ 23 سەۋٸردە كرەمل ٶكٸلٸ يۋريي ۋشاكوۆ. ونىڭ سٶزٸنشە, سوڭعى كەزدەرٸ تٷبەكتەگٸ جاعداي "رەتتەلگەن". ۋشاكوۆ "بۇعان سولتٷستٸك كورەيانىڭ يادرولىق قارۋدى سىناۋىن دوعارىپ, پوليگوندى جابۋى ىقپال ەتتٸ" دەيدٸ.
رەسەيدٸڭ مەملەكەتتٸك ريا "نوۆوستي" اگەنتتٸگٸنٸڭ جازۋىنشا, كەزدەسۋ كەزٸندە قانداي دا بٸر قۇجاتقا قول قويۋ نە بٸرٸگٸپ مەلٸمدەمە جاساۋ جوسپارلانباعان.
