Sársenbi kúni gýbernatorlar men ministrlermen kezdesken Resei prezidenti Vladimir Pýtin jiyn sońynda koronavirýsqa bailanysty reseilikterge úndeý joldady. Ol kún ótken saiyn halyqtyń birligi nyǵaia túskenin aityp, azamattardy karantin rejimin saqtaýǵa shaqyrdy.
"Bári ótedi jáne bul da ótip ketedi. Elimiz kóptegen synaqty bastan keshirgen: kezinde pechenegter de, "polovetster" de qysqan - Resei bárin jeńdi. Bul koronavirýs indetin de jeńemiz" dedi Pýtin.
Sóziniń basynda osyndai kúrdeli kezeńde dárigerler men kásipkerlerdi, halyqty qoldaý máselesine toqtaldy. Koronavirýs indeti kezinde ekonomikanyń damýyn tejemeý qajettigin, aimaqtar arasynda kólik, júk, jolaýshylar tasymalyn toqtatýǵa bolmaitynyn aitty. Jaqynda úkimet jetekshisi Mihail Mishýstin men Sheshenstan basshysy Ramzan Qadyrov aimaq arasynda shekarany jabý týraly másele boiynsha daýlasyp qalǵan edi.
Pýtin koronavirýspen kúresken dárigerlerdiń jalaqysyna qosymsha ústeme aqy qosylatynyn aitty. Onyń sózine qaraǵanda aldaǵy úsh aida meditsina qyzmetkerlerine 25 myń men 80 myń rýbl kóleminde ústeme aqy bekitiledi.
Resei prezidenti buǵan qosa, úkimetke bes kún ishinde biznesti qoldaityn qosymsha sharalardy anyqtaýdy tapsyrdy. Prezident kishi jáne orta kásiporyndardyń áleýmettik tólemin alty aiǵa deiin shegerýge ýáde berdi. Buǵan deiin qosymsha qun salyǵynan bólek barlyq salyq túrin keiinge shegerýge ýáde etken bolatyn.
Sońǵy málimet boiynsha, Reseide anneksiialanǵan Qyrymdy qosqanda 8672 adamnan koronavirýs tabylǵan. 63 adam kóz jumǵan.
