Resei prezidenti Vladimir Pýtin Ekinshi dúniejúzilik soǵystyń aiaqtalý ýaqytyn 2 qyrkúiekten 3 qyrkúiekke jyljytý týraly zańǵa qol qoidy. Qujat reseilik quqyqtyq portalda jariialandy.
Parlamenttiń joǵary palatasy ony 17 sáýirde maquldaǵan.
"1945 jyly Ekinshi dúniejúzilik soǵystyń aiaqtalýyna Sovet odaǵynyń Japoniiany jeńýi zor yqpal etti" delingen zań jobasyna berilgen túsiniktemede. Sovet odaǵynda bul kún 3 qyrkúiek dep belgilengen. Biraq bul kún eki ret qana - 1945 jáne 1946 jyly atap ótilgen. Keiinirek SSSR men álemniń ózge elderinde ekinshi dúniejúzilik soǵystyń aiaqtalýy resmi túrde 2 qyrkúiek dep belgilendi, sebebi dál osy kúni Japoniia kapitýliatsiia aktisine qol qoiǵan.
Reseidiń qazirgi zańnamasynda Ekinshi dúniejúzilik soǵys 2 qyrkúiekte aiaqtaldy dep jazylǵan.
Resei prezidenti janyndaǵy adam quqyǵy jónindegi keńes bul sheshimmen kelispeitinin aitty. Keńes ókilderiniń aitýynsha, 3 qyrkúiek - Beslandaǵy terroristik shabýyldan qaza bolǵandardy eske alý kúni. 2004 jyly Soltústik Osetiiada bolǵan oqiǵadan 334 adam qaza bolǵan. Bul eki oqiǵany bir kúnde qatar atap ótý qolaisyzdyq týdyrýy múmkin.
Al Qaýipsizdik federatsiiasynyń basshysy Valentina Matvienko zańdy qoldap, zań jobasy tóńiregindegi "daýdyń artyq ekenin" aitqan.
Keibir aqparat quraldary Kremldegi qupiia derekkózge súiene otyryp, 9 mamyrǵa josparlanyp, biraq koronavirýsqa bailanysty keiinge shegerilgen áskeri paradtyń 3 qyrkúiekte ótýi múmkin ekenin habarlady. Paradqa shaqyrylǵan Chehiia prezidenti Milosh Zeman da osyny aitqan.
Jeńistiń 75 jyldyǵyna arnalǵan áskeri paradtyń naqty qai kúni ótetini ázirge belgisiz. Buǵan deiin Pýtin biyl mindetti túrde parad ótedi dep málimdegen.
