Resei prezidenti Vladimir Pýtin men Belarýs basshysy Aleksandr Lýkashenkonyń jumadaǵy kezdesýi bes saǵatqa sozyldy. Sochide ótken bul kezdesýdiń qorytyndysy aqparat quraldaryna habarlanǵan joq.
Azattyqtyń habarlaýynsha, Reseidiń Sochi qalasynda ótken basqosýda Belarýstiń jolaýshy ushaǵyn Minskige kúshtep qondyrýyna álemniń reaktsiiasy sóz boldy.
Resei prezidenti Vladimir Pýtin Belarýs tóńiregindegi jaǵdaidy "emotsiianyń kórinisi" dep atady. Ol 2013 jyly Boliviia prezidenti Evo Morales mingen ushaqty Venaǵa qondyrý oqiǵasyn eske aldy. Ryanair ushaǵy Minskige qondyrylǵan kezde Reseidiń Kremlge jaqyn aqparat quraldary osy oqiǵany eske salǵan.
Pýtin Belarýstegi ushaqty buryp áketý oqiǵasyna kóp toqtalmai, eki el arasyndaǵy taýar ainalymy, odaqtyq memleket qurý barysy týraly kóbirek aitty.
Lýkashenko Batys elderiniń óz áýe keńistigine Belarýs áýekompaniialary ushaqtaryn jibermeý sheshimi "Belavia" kompaniiasyna aýyr tietinin eske sap, qoldaý kórsetkeni úshin Reseige alǵys bildirdi. Sondai-aq ol Máskeýdiń Belarýsti ainalyp ushatyn ushaqty óz keńistigine ótkizbei qoiǵanyn Minskige kórsetilgen qoldaý dep baǵalady (al resmi organdar muny tehnikalyq sebeptermen túsindirgen). Pýtin bul pikirge qarsylyq bildirgen joq.
- Pýtin men Lýkashenko kezdesýinen túsirilgen videoda taraptar Minskige burylǵan ushaqtan tutqyndalǵan belarýstyq blogshy Roman Protasevich pen onyń reseilik dosy Sofiia Sapeganyń aty-jónin atamaidy. Batys elderiniń pikiri boiynsha, Belarýs basshylyǵy Protasevichti qolǵa túsirý úshin Afinydan Vilniýsqa ushyp bara jatqan ushaqtyń baǵytyn májbúrlep burǵyzǵan.
- Kezdesý kezinde Lýkashenko Pýtinge Ryanair ushaǵyn qondyrýǵa qatysty áldebir qujattardy kóresetetinin aitty.
- 2013 jyly Reseiden Boliviiaǵa ushyp bara jatqan Morales mingen ushaq Eýropanyń birneshe eli óz áýe keńistiginen ótkizbei qoiǵan soń, Venaǵa qonýǵa májbúr bolǵan. Ispaniia, Italiia jáne Frantsiia bortynda AQSh qupiia qyzmetiniń qujattaryn jariialaǵany úshin izdeý salynǵan Edvard Snoýden bolýy múmkin degen kúdikpen ushaqty ótkizbei qoiǵan. Ushaqta Snoýden bolmai shyqqan.
- 23 mamyrda Belarýs basshylyǵy bortynda bomba bolýy múmkin degen kúdik baryn aityp, Afiny-Vilniýs reisin Minskige burǵyzǵan. Tekserý kezinde bomba tabylmady. Aleksandr Lýkashenko bomba týraly habar Shveitsariiadan elektrondy poshtamen keldi dep málimdegen. Biraq keiin mundai hattyń ushaqty burý týraly pármen berilgennen soń ǵana poshta jáshigine túskeni belgili boldy.
