Resei prezidenti Vladimir Pýtin alǵash ret oppozitsiialyq saiasatker Aleksei Navalnyidyń ýlanýyna bailanysty pikirin aitty. Beisenbi kúni "Valdai" forýmynda sóilegen Pýtin ádettegidei saiasatkerdiń atyn atamai, "azamat", "figýrant" degen sózdermen meńzep otyrdy.
Pýtinniń sózine qaraǵanda, eger bilik shynymen de Navalnyiǵa ý bergisi kelse, onda ony Germaniiaǵa emdeýge jibermes edi. Prezident oppozitsionerdiń shetelde emdelýine jeke ózi kómekteskenin aitty.
"Ol azamattyń (Navalnyidyń - red.) áieli bizden kómek suraǵannan keiin men birden prokýratýraǵa ony shetelge emdeýge jiberý múmkindigin qarastyrýdy tapsyrdym. Onyń ústinen qozǵalǵan ister men tergeý amaldaryna bailanysty shekteýler bar bolatyn, sol sebepti jibermeýi de múmkin edi" dedi Pýtin.
Navalnyi tamyz aiynyń sońynda Reseide ýlanǵan. Qazir saiasatker Germaniiada aiyqtyrý kýrsynan ótip jatyr. Osyǵan deiin batys mamandary onyń Reseide jasalǵan "Novichok" tobyna jatatyn qaýipti zattan ýlanǵanyn aitqan edi. Máskeý oqiǵaǵa qatysy joǵyn aitady.
Ýlanǵannan keiin bir aidan astam ýaqyt aýrýhanada komada jatyp, keiinnen esin jiǵan Navalnyi klinikadan shyqqannan keiin bergen suhbatynda "ý berý isine" prezident Vladimir Pýtinniń qatysy baryna senimdi ekenin jetkizgen. Onyń pikirinshe, ý berýdi Resei arnaiy qyzmeti - FSB nemese syrtqy barlaý qyzmeti uiymdastyrýy múmkin. Saiasatkerdiń paiymdaýynsha, qastandyqty uiymdastyrýshylar ony óltirýge oqtalǵan nemese múgedek jasaýǵa tyrysqan.
15 qazanda Eýroodaq pen Ulybritaniia Aleksei Navalnyidyń ýlanýyna bailanysty Reseige sanktsiia salǵan. Sanktsiia salynǵan alty sheneýnik arasynda FSB direktory Aleksandr Bortnikov, prezident ákimshiligi jetekshisiniń birinshi orynbasary Sergei Kirienko, Sibir federaldyq okrýgy prezidentiniń ýákiletti ókili Sergei Meniailo bar.
EO sanktsiiasyna sonymen birge organikalyq himiia jáne tehnologiia memlekettik ǵylymi zertteý institýty da ilingen. Onyń bólimshesinde "Novichok" tobyna jatatyn qaýipti zat jasaldy dep aitylady. Osyǵan deiin Eýropanyń úsh zerthanasy men Himiialyq qarýǵa tyiym salý jónindegi halyqaralyq uiym Aleksei Navalnyi analizinen osy qaýipti zattyń qaldyqtaryn tapqan edi.
