Foto: shutterstock
Pavlodar kólik prokýratýrasy 7 ai boiy zańdy jaýap ala almaǵan otandyq investordyń quqyǵyn qorǵady, - dep habarlaidy "Ult aqparat" Bas kólik prokýratýrasyna silteme jasap.
Kásipker Ekibastuz qalasynda 2021-2025 jyldarǵa arnalǵan kásipkerlikti damytý jónindegi Ulttyq investitsiialyq joba sheńberinde 2 milliard teńgeden asa somaǵa aimaqta iri logistikalyq jáne qurylys ortalyqtaryn salýdy josparlaǵan. Kásipkerge jobalardy odan ári tolyqqandy damytý úshin kirme jol qajet bolǵan.
"Alaida "QTJ" UK" AQ jáne onyń filialdarynyń jeke laýazymdy tulǵalary investorǵa onyń qurylysyna ruqsatty kelisýden bas tartqan, al 2023 jyldyń qazanynda shaǵyn bizneske óz qarajaty esebinen ulttyq tasymaldaýshynyń qajettilikteri úshin qosymsha jańa temir jol tósemin salýdy talap etetin tehnikalyq sharttardy bergen", - delingen habarlamada.
Aita ketý kerek, buryn "QTJ" UK" AQ uqsas jaǵdaida osy óńirdegi 3 kásipkerge temir joldarǵa janasý úshin tehnikalyq sharttardyń qajettiligi joq ekenin túsindirgen. Barlyq jaǵdaida berilgen jaýaptarǵa bir basshy qol qoiǵan.
"Kólik prokýratýrasynyń aralasýynan keiin ǵana ulttyq kompaniianyń "oidan shyǵarylǵan" ákimshilik kedergisi joiyldy, kásipker aldynda qoiylǵan talaptar keri qaitaryldy.
Prokýratýra aktisi boiynsha "QTJ" UK" AQ basqarma basshylyǵymen tehnikalyq sharttardy alý kezinde qosarlanǵan standarttarǵa jol bergen laýazymdy tulǵalardyń kinálilik dárejesi jáne jaýapkershilik túri qarastyrylyp jatyr. Magistraldyq jeli operatorynyń mundai zańsyz áreketteri qurylys materialdarynyń qunyn arttyrýǵa yqpal etetinin atap ótemiz", - delingen habarlamada.
