Qazaqstan shekarasyn buzyp ótken Qytai azamaty, etnikalyq qazaq Sairagúl Saýytbaidyń sotynda prokýror ony Qazaqstan aýmaǵynan shyǵarmaýdy, jazasyn jeńildetip, sot zalynan bosatýdy surady, dep habarlaidy Azattyq.
Jarkentte ótip jatqan sotta prokýror Arzygúl Imiarova Saýytbaidyń balalary Qazaqstan azamaty ekenin, osy elde turatynyn jáne balalarymen kezdesýin qamtamasyz etý qajettigin aitty. Ol osyǵan bailanysty ári Saýytbai qylmysyn moiyndaǵandyqtan oǵan Qazaqstannan shyǵarý jazasyn qoldanbaýdy surady.
"Is-áreketinde qylmystyq jazany aýyrlatatyn jaǵdailar bolmaǵandyqtan, ony Qazaqstan Qylmystyq kodeksiniń 392-baby 1 bóligimen ("memlekettik shekarany zańsyz qasaqana kesip ótý" - red.) kináli dep tanyp, alty aiǵa bas bostandyǵynan aiyrý, biraq ony shartty jazaǵa aýystyrý jáne alty ai probatsiialyq baqylaýǵa alý jazasyn kesýdi jáne sot zalynan bosatýdy suraimyn" dedi prokýror.
Prokýrordan keiin sóilegen Sairagúl Saýytbai men onyń advokaty Abzal Quspan prokýror suraǵan jazamen kelisetinin málimdedi.
Sýdia sot úkimi saǵat 15:30-da oqylatynyn aityp, úzilis jariialady.
Sairagúl Saýytbaiǵa Qazaqstan Qylmystyq kodeksiniń 392 - baby ("shekarany zańsyz buzyp ótý") boiynsha aiyp taǵylǵan. Qazaqstan zańy boiynsha, ol aiypty dep tanylsa, elden shyǵarylýy tiis.
Sot tergeýi kezinde Sairagúl Saýytbai ózine taǵylǵan aiypty tolyq moiyndaitynyn aityp, prokýrormen protsessýaldyq kelisim jasasýdy suraǵan. Ol ózine Qytaida "saiasi qysym jasalǵandyqtan shekaradan zańsyz ótýden ózge jol qalmaǵanyn" málimdegen. Saýytbaidyń sózinshe, ol Qytaida qupiia sanalatyn "saiasi úirený ortalyqtarynda" jumys istegen, "memleket qupiiasyn áshkerelemeý" týraly qolhat bergen. Sairagúl Saýytbai Qytaiǵa qaitarylsa, ol elde ózine ólim jazasy kesilýi múmkin ekenin, Qazaqstanda qandai jazaǵa da kelisetinin málimdegen.
Sairagúl Saýytbaidyń kúieýi Ýáli Islám biyl mamyrda áielin Qazaqstan Ulttyq qaýipsizdik komitetiniń qyzmetkerleri "Qorǵas keden beketin zańsyz buzyp ótti" degen aiyppen ustaǵanyn habarlaǵan.
Sairagúl Saýytbaidyń kúieýi Ýáli Islám men eki balasy Qazaqstan azamattyǵyn alǵan. Erli-zaiypty Ýáli Islám men Sairagúl Saýytbai eki balasymen birge Qazaqstanǵa 2016 jyly kóship kelmek bolǵan.
