Tarazda Turan Álem Bankiniń burynǵy tóraǵasy Erjan Tátishevti óltirdi dep aiyptalyp otyrǵan biznesmen Murathan Toqmádi isine qatysty sot jaryssózi ótip jatyr. Prokýror Iliias Esqaliev Toqmádige jasaǵan qylmysy úshin 12 jyl bas bostandyǵynan aiyrý jazasyn surady, dep habarlaidy Baq.kz tilshisi.
Murathan Toqmádige 1997 jylǵy redaktsiiadaǵy QR QK 96-baby 2-bólimi «j», «z» tarmaqtarynda (adamdar toby, aldyn ala sóz bailasý arqyly adamdar toby jasaǵan, paida tabý maqsatymen, sol siiaqty jaldanyp ne qaraqshylyqpen, bopsalaýmen ne banditizmmen adam óltirý) qarastyrylǵan qylmystar jasady degen aiyp taǵylyp otyr.
Sot otyrysynda prokýrorlar - Ashat Nurlybaev pen Iliias Esqaliev Murathan Toqmádidiń kinásin dáleldeitin aiǵaqtardy keltirdi.
«Murathan Toqmádidiń kinási tolyq dáleldendi. Qurmetti sot, Murathan Toqmádidi jalpy 12 jylǵa bas bostandyǵynan aiyrýdy suraimyn», - dedi prokýror Esqaliev.
Atap ótsek, sot protsesi Jambyl oblysy boiynsha qylmystyq ister jónindegi mamandandyrylǵan aýdanaralyq sotta ótip jatyr. Protseske sýdia Azamat Tilepov tóraǵalyq etýde.
Jalpy, 16 aqpanda bastalǵan sot protsesinde barlyǵy 130 kýágerdiń bergen jaýaby men 79 tom qylmystyq is materialdary qaraldy. Osylaisha, 14 jyl burynǵy qylmys qaita tekserilýde. Al, 11 jyl buryn biznesmen Toqmádi dál osy qylmysy úshin jazadan sytylyp ketken bolatyn. Sol kezde qylmys abaisyzda jasaldy delinip, Murathan Toqmádi Taraz qalalyq sotynyń 2007 jylǵy 3 qyrkúiektegi úkimimen bir jylǵa bas bostandyǵynan aiyrylyp, raqymshylyqpen jazadan bosatyldy. Bul is boiynsha tergeý amaldary men sottar 3 jylǵa sozylǵan edi.
2017 jylǵy 12 maýsymda Almatydaǵy arnaiy operatsiia barysynda «QazStroiSteklo» JShS bas direktorynyń keńesshisi Murathan Toqmádi ustaldy. Biznesmen «Iri kólemdegi múlikke ie bolý maqsatynda bopsalaý» baby boiynsha qylmys jasady degen kúdikpen quryqtalyp, úsh jylǵa bas bostandyǵynan aiyryldy. 2017 jylǵy qazanda KTK arnasynan kórsetilgen filmde Toqmádi Erjan Tátishevti óltirgenin moiyndap, bankirdiń kózin Muhtar Áblázovtiń tapsyrysymen joiǵanyn aitty. Bul fakt buǵan deiin júrgizilgen tergeý barysynda da anyqtalyp, is qaita qozǵalǵan edi. Sondai-aq, Áblázovten Tátishevti óltirý úshin 2 transhpen 4 mln dollar kóleminde syiaqy alǵanyn da jasyrmady. Osylaisha, Muhtar Áblázov Erjan Tátishevtiń óliminen keiin Turan Álem Bankiniń basshylyǵyna kelgen. 2018 jylǵy 16 aqpanda Jambyl oblystyq sotynda Toqmádiden jaýap alynyp, ol osy aitqandaryn rastady.
