Memlekettik aiyptaýshy sottan burynǵy ministr Eljan Birtanovty kináli dep tanyp, oǵan 6 jyl bas bostandyǵynan aiyrý jazasyn taǵaiyndaýdy surady. Sondai-aq, prokýror Birtanov pen onyń burynǵy orynbasary Oljas Ábishevten bir jarym milliard teńge óndirip alýdy surady, - dep habarlaidy "Ult aqparat" Tengrinews.kz agenttigine silteme jasap.
"Birtanovty QR QK-niń 361-baby 4-bóligi 3-tarmaǵynda kózdelgen qylmysty jasaǵany úshin kináli dep tanýdy jáne memlekettik qyzmette qyzmet atqarý quqyǵynan ómir boiyna aiyra otyryp, 6 jylǵa bas bostandyǵynan aiyrý túrindegi jaza taǵaiyndaýdy usynamyn.
Birtanovqa qatysty úi qamaǵy túrindegi bultartpaý sharasy qamaýda ustaýǵa aýystyrylsyn. Jazany óteý merzimi úkim zańdy kúshine engen kúnnen bastap eseptelsin. Birtanovty qamaýda ustaý ýaqyty 2020 jylǵy 30 qazannan 2020 jylǵy 6 qarashaǵa deiin, sondai-aq úkim shyǵarylǵan kúnnen bastap ol zańdy kúshine engenge deiin jazany ótegen 1,5 kún úshin qamaýda ustaýdyń 1 kúni esebinen jaza merzimine eseptelsin.
Birtanovty úi qamaýynda ustaý ýaqyty 2020 jylǵy 7 qarashadan bastap úkim shyǵarylǵan kúnge deiin jazany ótegen bir kún úshin úi qamaýynyń 2 kúni esebinen jaza merziminde esepke alynsyn", - dedi prokýror Baýyrjan Shekenov sotta.
Aiyptaý Birtanov pen onyń orynbasary Ábishevten 1 milliard 548 million 136 myń 575 teńgeni teń úlestermen óndirip alýdy, sondai-aq Birtanovtan 2020 jylǵy naýryzda koronavirýs pandemiiasy kezinde sanitarlyq aviatsiia bortyn paidalanýǵa jumsalǵan 5 million 503 myń 721 teńgeni óndirip alýdy talap etti.
Odan bólek Baýyrjan Shekenov Birtanovty "Qurmet" memlekettik marapatynan aiyrýdy usyndy.
Eske sala keteiik, burynǵy densaýlyq saqtaý ministri Eljan Birtanov pen onyń orynbasary Oljas Ábishevke meditsinalyq mekemelerdiń qyzmetin avtomattandyrý jáne olardy basqarýǵa arnalǵan aqparattyq júieni ázirleý kezinde laýazymdyq ókilettigin asyra paidalandy degen aiyp taǵyldy. Platforma azamattardy emdeý mekemelerine tirkeý, dárigerdi úige shaqyrý, dárigerdiń qabyldaýyna jazylý, sondai-aq turǵyndarǵa meditsinalyq anyqtamalar berý qyzmetterin avtomattandyrýy tiis bolatyn.
